काठमाडौँ : विनाशकारी रसुवा बाढीका कारण हालसम्म १ हजार २९४ जनाको मृत्यु भएको पुष्टि भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार साँझ आयोजना गरेको पत्रकार सम्मेलनमा हालसम्म १ हजार २९४ जनाको शव फेला परेको र ५ हजार ५३ जना अझै बेपत्ता रहेको जनाएको हो ।
१३ हजार ९५ जनाको सकुशल उद्धार गरिएको छ भने रसुवा, नुवाकोट र धादिङका ३७ वटा होल्डिङ सेन्टरमा ४ हजार ६२७ जनाले आश्रय लिइरहेका छन्। बाढीबाट कुल ३२ हजार ९३३ जना प्रत्यक्ष प्रभावित भएको प्राधिकरणले जनाएको छ । ७ हजार ५७० घर पूर्ण रूपमा क्षतिग्रस्त बनेका छन्।
प्राकृतिक विपद्ले मानवीयसँगै भौतिक र आर्थिक क्षेत्रमा पनि ठूलो धक्का पुर्याएको छ। ५५ किलोमिटर सडक, ३७ मोटरेबल र ६८ झोलुङ्गे पुलका साथै ४८ सरकारी संरचना, १८ विद्यालय र ७ स्वास्थ्य संस्थामा क्षति पुगेको छ।
त्यस्तै ऊर्जा र कृषि क्षेत्रमा पनि गम्भीर असर परेको छ। ३ जलविद्युत् आयोजना, १ सोलार प्लान्ट र २ प्रसारण लाइनमा क्षति पुग्दा ७८३ मेगावाट विद्युत् उत्पादन अवरुद्ध भएको छ भने १ हजार ८०६ हेक्टर कृषियोग्य जमिन नष्ट हुँदा ७ हजार ६८६ मेट्रिक टन खाद्यान्न उत्पादन घट्ने प्रारम्भिक आकलन गरिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |