काठमाडौं : भैरहवा कारागारमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेको पक्षमा नेपाली कांग्रेस ‘बीपी’ का शीर्ष नेताहरूले समर्थन जनाएका छन्।
बिहीबार पार्टी मुख्यालय वनस्थलीमा पुगेका कांग्रेस बीपी सभापति सुशीलमान शेरचन, उपसभापति कर्ण मल्ललगायत नेताहरूले लामिछानेको पक्षमा हस्ताक्षर गरेका हुन्।
रास्वपाले लामिछानेमाथि राज्यले ‘राजनीतिक प्रतिशोध’ साँधेर कारबाही गरेको आरोप लगाउँदै हस्ताक्षर अभियान चलाइरहेको छ। असार ७ गते रास्वपाको तेस्रो स्थापना दिवसको अवसरमा लामिछानेले २० पृष्ठ लामो अपिल सार्वजनिक गर्दै आम जनमत र राजनीतिक दलहरूसँग समर्थन जुटाउने उद्देश्यले हस्ताक्षर सङ्कलन अभियान सुरु गरेका थिए।
हस्ताक्षरपछि उपसभापति मल्लले लामिछानेमाथिको मुद्दालाई ‘राजनीतिक प्रतिशोध’ को संज्ञा दिँदै न्यायिक प्रक्रियामा हस्तक्षेप भएको आरोप लगाए। रास्वपाले देशव्यापी रूपमा हस्ताक्षर सङ्कलनलाई तीव्र बनाएको छ भने लामिछानेको रिहाइका लागि दबाब सिर्जना गर्ने रणनीति अघि बढाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |