रास्वपाको नयाँ नेतृत्वको शपथ,आजदेखि औपचारिक रूपमा जिम्मेवारी

काठमाडौँ :  प्रथम राष्ट्रिय महाधिवेशनबाट निर्वाचित राष्ट्रिय स्वतन्त्र पार्टी (रास्वपा) को नयाँ नेतृत्वले बुधबार शपथ ग्रहणसँगै औपचारिक रूपमा जिम्मेवारी सम्हालेको छ।

शपथलगत्तै बसेको केन्द्रीय समितिको पहिलो बैठकले पार्टीका निर्वाचन र लेखा आयोगलाई यथावत् राख्ने तथा अनुशासन आयोगको प्रमुखमा लेखनाथ पौडेललाई नियुक्त गर्ने निर्णय गरेको छ।

बनस्थलीस्थित केन्द्रीय कार्यालयमा आयोजित कार्यक्रममा सभापति रवि लामिछानेले नवनिर्वाचित पदाधिकारी र केन्द्रीय सदस्यलाई शपथ गराएका थिए। गत असार ७ देखि १२ गतेसम्म भरतपुरमा सम्पन्न प्रथम महाधिवेशनबाट ६ जना पदाधिकारी र ९९ जना केन्द्रीय सदस्य निर्वाचित भएका थिए।

शपथ समारोहपछि सभापति लामिछानेले नवनिर्वाचित पदाधिकारी तथा सदस्यलाई प्रमाणपत्र र मायाको चिनो प्रदान गरेका थिए। बैठकले लेखा आयोग प्रमुखमा अभिषेक घिमिरे र निर्वाचन आयोग प्रमुखमा भुवन केसीलाई निरन्तरता दिएको छ। नयाँ नेतृत्वले संगठनात्मक संरचनालाई प्रभावकारी बनाउँदै महाधिवेशनबाट पारित निर्णय कार्यान्वयनमा केन्द्रित हुने संकेत गरेको छ।