जलेको संसद भवनबाट चंगुलको टिजर रिलिज

काठमाडौँ :  गत वर्ष भाद्र २३ गते देशलाई तरंगित बनाएको (जेन्जी) आन्दोलन र त्यसपछिको राजनीतिक सामाजिक परिदृश्यलाई विषयवस्तु बनाइएको चलचित्र ‘चंगुल’को टिजर सार्वजनिक गरिएको छ । नयाँ बानेश्वरस्थित वीरेन्द्र अन्तर्राष्ट्रिय सम्मेलन केन्द्र (पुरानो संसद भवन) मा आयोजित जेन्जी शहीद स्मृति सभाको विशेष समारोहबीच चलचित्रको दृश्य झलक (टिजर) सार्वजनिक गरियो ।

गृहमन्त्री सुधन गुरुङ, कानुनमन्त्री सोबिता गौतम, भूमिव्यवस्था तथा सङ्घीय मामिला मन्त्री प्रतिभा रावल र पूर्वाधार विकासमन्त्री सुनिल लम्सालको उपस्थितिमा आयोजित उक्त कार्यक्रममा टिजर प्रदर्शन गरिएको थियो । आन्दोलनको स्मृति र त्यसले सिर्जना गरेको पृष्ठभूमिमा आधारित यस चलचित्रको टिजरलाई उपस्थित मन्त्री तथा दर्शकहरूले सकारात्मक प्रतिक्रिया दिएका छन् ।

राम गौतमको निर्देशन र मालती कार्कीको निर्माणमा बनेको यस चलचित्र आगामी असोज १६ गतेदेखि देशव्यापी प्रदर्शनमा आउने तयारीमा छ ।

चलचित्रमा रवि कार्की, लय सङ्ग्रौला, लक्ष्मीनाथ तिमल्सिना, राकेशकुमार राई, आशा विश्वकर्मा, स्वस्तिका लामिछाने, कृष्ण रसाल, र रोहित ढुङ्गाना मुख्य भूमिकामा देखिँदै छन् भने बालकलाकारका रूपमा रिम्शा कार्कीको अभिनय रहेको छ ।

दीपेन बस्न्यातको छायाङ्कन तथा सम्पादन रहेको ‘चंगुल’मा विपिन आचार्य, नन्दनी अधिकारी र विक्रम कार्कीको संगीत छ । चलचित्रका द्वन्द्व दृश्यहरूलाई देव महर्जनले निर्देशन गरेका छन् । युवा पुस्ताको विद्रोह र त्यसपछिको परिस्थितिलाई मुख्य विषय बनाइएको यो चलचित्रले हलमा कस्तो प्रभाव पार्छ, त्यो भने असोज १६ पछि मात्र प्रस्ट हुनेछ ।