छानबिन समिति गठन गर्ने सहमतिपछि डा. केसीको २५औँ सत्याग्रह अन्त्य

काठमाडौँ :  चिकित्सा शिक्षा आयोगका निर्णय र मेडिकल कलेजहरूको सिट निर्धारण प्रक्रियामा अनियमितता भएको आशंकाबारे छानबिन गर्न सरकार तयार भएपछि प्राडा.गोविन्द केसीले २५औँ सत्याग्रह अन्त्य गरेका छन् । शिक्षा तथा खेलकुदमन्त्री सस्मित पोखरेलले शनिबार राति त्रिवि शिक्षण अस्पताल पुगेर छबुँदे सहमतिपत्रमा हस्ताक्षर गरेपछि केसीले अनशन तोडेका हुन्।

सहमतिअनुसार चिकित्सा शिक्षा आयोगका पछिल्ला निर्णयमा निर्धारित मापदण्ड पालना भए नभएको र स्वार्थको द्वन्द्व देखिए नदेखिएको विषयमा छानबिन गर्न प्रा. रमेशप्रसाद आचार्यको संयोजकत्वमा पाँच सदस्यीय समिति गठन गरिनेछ।

समितिले प्रतिवेदन बुझाएपछि मात्रै चिकित्सा शिक्षाको साझा प्रवेश परीक्षा उत्तीर्ण विद्यार्थीको म्याचिङ प्रक्रिया अघि बढाइने सहमतिमा उल्लेख छ। छानबिनबाट दोषी देखिएका पदाधिकारीलाई कारबाही गर्ने प्रतिबद्धता पनि सरकारले जनाएको छ।

सहमतिपत्रमा मन्त्री पोखरेलसहित डा. केसी, प्रधानमन्त्रीका स्वास्थ्य सल्लाहकार प्रा.डा. जगदीश अग्रवाल, सांसद पुकार बम र नेपाल मेडिकल एसोसिएसनका अध्यक्ष डा.बद्री रिजालले हस्ताक्षर गरेका छन्। अनशन तोडाउन पुगेका मन्त्री पोखरेलले यो नै डा. केसीको अन्तिम सत्याग्रह हुने विश्वास गरेका छन् ।