टुरिजम ४.० : दिगोपनलाई युवाको डिजिटल सीपबाट टेवा

काठमाडौं : दिगो पर्यटन प्रवर्द्धनमा उद्यमशील युवालाई प्रविधिमैत्री भूमिकामा ल्याउन नयाँ मार्ग खोज्ने उद्देश्यसहित ‘टुरिजम ४.० मोविलाइजिङ युथ फर टेक–ड्राइभन चेन्ज’ शीर्षकको गोलमेच गोष्ठी काठमाडौंमा सम्पन्न भएको छ। नेपालमा प्रवर्द्धित डिजिटल प्रविधिको उपयोगले पर्यटन क्षेत्रलाई कसरी रूपान्तरण गर्न सक्छ भन्ने मुख्य एजेन्डामा केन्द्रित छलफल एकेडेमी अफ इन्नोभेशन फर इकोनोमिक डेभलपमेन्ट ९अकाइड० नेपालले आयोजना गरेको हो।

नेपाल पर्यटन बोर्ड ९एनटीबी० र संयुक्त राष्ट्र विकास कार्यक्रम ९यूएनडीपी० नेपालको साझेदारीमा सञ्चालित ‘सस्टेनेबल टुरिजम परियोजना’ अन्तर्गत गरिएको गोष्ठीमा कृत्रिम बुद्धिमत्ता, बिग डेटा, ब्लकचेन, आइओटी, रोबोटिक्स र इमर्सिभ मिडिया जस्ता प्रविधि समेटिने टुरिजम ४.० अवधारणाले नेपालको पर्यटनलाई स्मार्ट, दिगो र संकट–सहने बनाउने सम्भावनाबारे केन्द्रित बहस भएको आयोजकले जनाएको छ।

विश्व पर्यटन क्षेत्र तीव्र रूपमा डिजिटल रूपान्तरणतर्फ धकेलिँदै गएको बेला नयाँ पुस्ताको रुचि दिगोपन, मौलिकता र नवप्रवर्तनमा केन्द्रित हुन थालेकाले नेपालले समयअनुकूल तयारी गर्नुपर्ने वक्ताहरूको तर्क थियो। जेन–जेड नेतृत्व तहमा प्रवेश गरिरहेको र जेन–अल्फा अझ उन्नत डिजिटल युगको ढोका खोल्दै गरेको वर्तमान चिनारीलाई ध्यानमा राख्दै भविष्यका चुनौती–अवसर पहिल्याउनुपर्ने आवश्यकता औंल्याइयो।

अकाइड नेपालकी सीईओ दुर्गा थापाले पर्यटन क्षेत्रमा प्रविधि–दक्ष युवाको सहभागिता बढाउँदै उनीहरूलाई डिजिटल तथा जलवायुसम्बन्धी आवश्यक सीपले सुसज्जित गर्नु दिगोपनका लागि आधार हुने बताइन्। ‘‘प्रविधि, नैतिकता र सांस्कृतिक सीपको सन्तुलन बिना दिगो पर्यटन सम्भव हुँदैन,’’ उनले भनिन्।

कार्यक्रममा स्मार्ट पर्यटन प्रविधिको विस्तार, पुस्तागत तयारी तथा प्रविधिमैत्री पर्यटन क्षेत्र निर्माणका रणनीतिबारे विस्तृत छलफल गरिएको थियो। गोष्ठीमा सरकारी निकायका प्रतिनिधि, नेपाल पर्यटन बोर्ड, पर्यटन व्यवसायी, प्रविधि तथा पर्यटन विज्ञ, संघ–संस्था, हस्पिटालिटी कलेजका प्राध्यापक–विद्यार्थी, युवा उद्यमी र पत्रकारको सहभागिता रहेको आयोजकले जनाएको छ।