रास्वपामा सहमतिमै नेतृत्व चयनको प्रयास

चितवन :  राष्ट्रिय स्वतन्त्र पार्टी (रास्वपा)का महामन्त्री भूपदेव शाहले आगामी महाधिवेशनबाट सहमतिमै नेतृत्व चयन गर्ने प्रयास भइरहेको बताएका छन्।

भरतपुरमा हुने केन्द्रीय महाधिवेशनको उद्घाटनस्थलमा शुक्रबार पत्रकारसँग कुरा गर्दै उनले सहमतिका लागि सबै पक्षसँग छलफल भइरहेको बताए। ‘सबै एकै ठाउँमा उभिएकै कारण पार्टीले दुईतिहाइ समर्थन हासिल गर्न सकेको हो,’ उनले भने, ‘महाधिवेशनबाट पनि सबैलाई सम्मानित रूपमा अघि बढाउने वातावरण बनाउन प्रयासरत छौं।’

सहमति हुन नसके लोकतान्त्रिक प्रक्रियाअनुसार प्रतिस्पर्धाबाट नेतृत्व चयन हुने उनले स्पष्ट पारे। महाधिवेशनलाई पार्टी जीवनको सबैभन्दा महत्वपूर्ण पर्वका रूपमा लिइएको पनि उनको भनाइ थियो।

चितवनमै महाधिवेशन आयोजना गरिएको विषयमा शाहले पार्टीको जन्म र राजनीतिक यात्रासँग जोडिएको स्थान भएकाले भरतपुर रोजिएको बताए। रास्वपाको केन्द्रीय महाधिवेशन असार ७ देखि ९ गतेसम्म भरतपुरमा हुँदैछ। महाधिवेशनको उद्घाटन सभापति रवि लामिछाने र प्रधानमन्त्री तथा पार्टीका वरिष्ठ नेता बालेन्द्र शाहले गर्ने कार्यक्रम रहेको उनले जानकारी दिए।