काठमाडौं : मृगौला रोगबाट पीडित पाल्पाका बिक्रम रावलको उपचार सहयोग अभियानमा सक्रिय भूमिका निर्वाह गरेका समाजसेवी यमलाल न्यौपानेलाई सम्मान गरिएको छ। विदेशमा रहेर अभियानका लागि आर्थिक सहयोग संकलन तथा जनचेतना फैलाउन योगदान पुर्याएको भन्दै लायन्स क्लब अफ काठमाडौं साझाले उनलाई प्रशंसापत्र प्रदान गरेको हो।
क्लबका अध्यक्ष डा। दिलीप कुमार मल्लले न्यौपानेको मानवीय सेवाको कदर गर्दै प्रशंसापत्र प्रदान गरेका हुन्। न्यौपाने हाल वैदेशिक रोजगारीका सिलसिलामा संयुक्त अरब इमिरेट्स (दुबई) मा रहे पनि विभिन्न सामाजिक तथा मानवीय अभियानमा सक्रिय रहँदै आएका छन्।
अर्घाखाँचीको साविक पटौटी गाविस (हाल पाणिनी गाउँपालिका-४ ) निवासी न्यौपाने शिक्षक केशवराज न्यौपाने र रेखा न्यौपानेका पुत्र हुन्। सामाजिक सञ्जालमार्फत सहयोग जुटाउने तथा समस्यामा परेकाहरूको साथमा उभिने कार्यका कारण उनी सामाजिक क्षेत्रमा परिचित छन्।
पाल्पाको तानसेन निवासी बिक्रम रावल दुवै मृगौला निष्क्रिय भएपछि टिचिङ अस्पताल र ग्रीन सिटी अस्पतालमा नियमित डायलाइसिस गराइरहेका छन्। उनको उपचारका लागि सञ्चालन गरिएको ‘बिक्रम रावल बचाऔँ अभियान’ मा न्यौपानेले विदेशबाटै सहयोग संकलन र अभियान विस्तारमा महत्वपूर्ण भूमिका खेलेका थिए।
सम्मान कार्यक्रममा प्रमुख अतिथि डा. रोसनी बादी तथा लायन्स क्लब अफ काठमाडौं ,युनाइटेड स्टककी अध्यक्ष सरिता हमाललगायतको उपस्थिति थियो। कार्यक्रममा अध्यक्ष मल्लले यमलाल न्यौपानेजस्ता व्यक्तिको सक्रियताले समाजमा मानवता, सहयोग र सेवाभावको संस्कारलाई थप बलियो बनाउने विश्वास व्यक्त गरे।
न्यौपानेलाई प्रदान गरिएको प्रशंसापत्र उनकी पत्नी सृजना रावलले ग्रहण गरेकी थिइन्। कार्यक्रममा सहभागीहरूले न्यौपानेको सामाजिक योगदानको प्रशंसा गर्दै उनको सेवायात्रा अझ प्रभावकारी र निरन्तर रहोस् भन्ने शुभकामना व्यक्त गरेका थिए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |