काठमाडौँ : दोस्रो हाफमा खेलको लय समातेको स्विट्जरल्यान्डले बोस्निया एन्ड हर्जेगोभिनामाथि प्रभावशाली जित निकाल्दै फिफा विश्वकपको समूह ‘बी’ मा शीर्ष स्थान कब्जा गरेको छ।
लस एन्जलस स्टेडियममा शुक्रबार राति भएको खेलमा स्विट्जरल्यान्डले १० खेलाडीमा सीमित बोस्नियालाई ४–१ ले पराजित गरेको हो । खेलको ८०औँ मिनेटमा बोस्नियाका डिफेन्डर तारिक मुहारेमोभिच रातो कार्ड पाएर बाहिरिएपछि स्विस टोलीले खेलमा पूर्ण नियन्त्रण जमाएको थियो।
प्रशिक्षक मुराट याकिनले ७१औँ मिनेटमा मैदान छिराएका जोहान मान्जाम्बी जितका नायक बने। उनले दुई गोल गरे भने रुबेन भार्गास र ग्रानिट जाकाले एक–एक गोल थपे। मान्जाम्बीले ७७औँ मिनेटमा गोल गर्दै अग्रता दिलाएका थिए। त्यसपछि भार्गासले ८४औँ मिनेटमा गोल गरे। ९०औँ मिनेटमा मान्जाम्बीले व्यक्तिगत दोस्रो गोल गरेपछि स्विट्जरल्यान्ड सहज अवस्थामा पुगेको थियो।
इन्जुरी समयमा एर्मिन माह्मिकले बोस्नियाका लागि एक गोल फर्काए पनि त्यसको केहीबेरपछि जाकाले पेनाल्टीमा गोल गर्दै ४–१ को जित सुनिश्चित गरे।
जितसँगै स्विट्जरल्यान्ड एक जित र एक बराबरीबाट समूह ‘बी’ को शीर्ष स्थानमा उक्लिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |