खरिदकर्ता सक्रिय बन्दा सात दिनपछि शेयर बजार हरियो

काठमाडौँ :  लगातार सात कारोबार दिनसम्म ओरालो लागेको शेयर बजार बुधबार भने सुधार भएको छ । खरिदकर्ता सक्रिय बन्दा नेपाल स्टक एक्सचेन्ज (नेप्से) परिसूचक ४४ दशमलव ५९ अंकले बढेर २ हजार ६ सय ५२ दशमलव ९३ विन्दुमा पुगेको छ। बजारसँगै कारोबार रकम पनि अघिल्लो दिनको तुलनामा बढेर ३ अर्ब ८६ करोड ११ लाख रुपैयाँ पुगेको छ।

बुधबार ३६२ कम्पनीका ९५ लाख ४७ हजार कित्ता शेयर ५६ हजार ८५० पटक किनबेच भएका छन्। सेन्सेटिभ परिसूचक ५ दशमलव ७७ अंकले बढ्दा फ्लोट र सेन्सेटिभ फ्लोट परिसूचक पनि उकालो लागेका छन्। स्नो रिभर्सको शेयरमा सकारात्मक सर्किट लागेको दिन सिवाईसी लघुवित्त र भुजुङ हाइड्रोपावरको मूल्य १४ प्रतिशतभन्दा बढीले बढ्यो। यता कर्पोरेट डेभलपमेन्ट बैंकको शेयर मूल्य ५ दशमलव २१ प्रतिशतले घटेको छ।

कारोबार रकमका आधारमा लक्ष्मी सनराइज बैंक अग्रस्थानमा रह्यो। रिलायन्स स्पिनिङ मिल्स, आँखुखोला जलविद्युत र एनआरएन इन्फ्रास्ट्रक्चर एन्ड डेभलपमेन्ट पनि उच्च कारोबार हुने कम्पनीमा परे। बजारमा कारोबार भएका १३ वटै उपसमूहका परिसूचक बढेका छन्, जसमा व्यापार उपसमूह सर्वाधिक २।६० प्रतिशतले उकालो लागेको छ।