तीजमा पशुपतिमा सुरक्षा कडा, ९ हजारले गरे दर्शन

काठमाडौं :  हरितालिका तीजको अवसरमा पशुपतिनाथ मन्दिर क्षेत्रको सुरक्षा व्यवस्था चुस्त बनाइएको छ। दर्शनार्थीको उल्लेख्य भिडलाई मध्यनजर गर्दै बिहान सवा ३ बजेदेखि नै मन्दिरका चारै ढोका खुला गरिएका छन्। बिहान ७ बजेसम्म करिब ९ हजार भक्तजनले दर्शन गरिसकेका छन् भने ३ हजारभन्दा बढी लाइनमा रहेको प्रहरीले जनाएको छ ।

भीड व्यवस्थापन, उद्धार, स्वास्थ्य, खानेपानी तथा ट्राफिक सहजीकरणका लागि नेपाल प्रहरी र सशस्त्र प्रहरी रातैदेखि खटिएका छन्। सुरक्षाका लागि दुई सिफ्टमा गरी २ हजार ५ सयभन्दा बढी प्रहरी परिचालन गरिएको छ, जहाँ प्रत्येक सिफ्टमा १ हजार २ सय ५० जना खटिएका छन्।

सुरक्षा निगरानीका लागि सीसीटीभी, ड्रोन, सञ्चार प्रविधिका साथै सादा पोसाकका सुरक्षाकर्मी, महिला प्रहरी र विपद् उद्धार टोलीसमेत तैनाथ गरिएको छ। हराएका व्यक्तिको खोजी, सूचना प्रवाह र आकस्मिक स्वास्थ्य सेवालाई चुस्त बनाउँदै सहज दर्शनको प्रबन्ध मिलाइएको प्रहरीले जनाएको छ।