सत्य र अहिंसाको सन्देशसँगै गान्धी जयन्ती मनाइयो

काठमाडौँ : सत्य, अहिंसा, शान्ति र मानवताको सन्देश प्रवाह गर्दै २०औँ शान्ति दिवस तथा १५७औँ महात्मा गान्धी जयन्ती नेपाल चर्खा प्रचारक गान्धी–तुलसी स्मारक महागुठी काठमाडौँमा भव्य रूपमा मनाइएको छ।

शान्ति समाज नेपालका संस्थापक अध्यक्ष तथा गान्धीवादी नेता कृष्ण पहाडीको प्रमुख आतिथ्य तथा आश्रमकी कार्यवाहक अध्यक्ष गोमा गौतमको अध्यक्षतामा सम्पन्न कार्यक्रममा गान्धीका विचार र दर्शनको वर्तमान सन्दर्भमाथि चर्चा गरियो।

कार्यक्रममा रामकृष्ण मिसन, नेपालका प्रमुख स्वामी एकार्थनाथ, वरिष्ठ अधिवक्ता तथा मुख्य गुठियार विपुलेन्द्र चक्रवर्ती, युवा नेता शंकर तिवारी तथा भारतीय राजदूतावासका प्रथम सचिव वशिष्ठ नन्दन (देवकी नन्दन) ले शुभकामना मन्तव्य व्यक्त गर्दै गान्धीले प्रतिपादन गरेको सत्य, अहिंसा र शान्तिको मार्गलाई व्यवहारमा उतार्नुपर्नेमा जोड दिनुभयो।

युवा नेता शंकर तिवारीले गुठी १०० वर्षसम्म निरन्तर सञ्चालन भएकोमा हर्ष व्यक्त गर्दै संस्थामा बुढ्यौली आउन नदिन नयाँ कार्यक्रमहरू सञ्चालन गर्नुपर्ने बताउनुभयो। वरिष्ठ गुठियार विपुलेन्द्र चक्रवर्तीले गान्धीभन्दा २४ वर्षपछि जन्मिएका लालबहादुर शास्त्री पनि एक आदर्श व्यक्तिका रूपमा भारतमा जन्मिएर प्रधानमन्त्रीसम्म बनेको प्रसंग स्मरण गराउनुभयो। भारतीय राजदूतावासका प्रथम सचिवले गान्धीका विचार आज विश्वभर सम्मानित हुँदै गएको चर्चा गर्दै अहिंसा र सत्य कहिल्यै नमासिने बताउनुभयो।

प्रमुख अतिथिको आसनबाट बोल्दै कृष्ण पहाडीले मानव अधिकार तथा शान्ति समाजको पहिलो आदर्श नै अहिंसा रहेको बताउनुभयो। प्रकृतिमाथिको दोहन र युद्धले पुर्‍याएको जनधनको क्षतिजस्ता समस्या समाधानका लागि गान्धी दर्शनले प्रेरणा दिने उल्लेख गर्दै उहाँले तुलसीमेहर श्रेष्ठको योगदानलाई पठनपाठनको विषय बनाउनुपर्नेमा जोड दिनुभयो।

आश्रमकै भगवती थापा समूहको गान्धी भजनबाट सुरु भएको कार्यक्रममा संस्थामा लामो समयदेखि विभिन्न जिम्मेवारीमा रहेर योगदान पुर्‍याउनुभएका ८ जना महानुभावहरूलाई सम्मान गरिएको थियो। वयोवृद्ध सदस्यहरू इन्दिरा सापकोटा र नरपाल खत्रीलाई समेत सम्मान गरिएको सो कार्यक्रममा सम्मानपत्रको वाचन महासचिव मनहरि खड्काले गर्नुभएको थियो।

कार्यक्रमको सञ्चालन गुठीका सहसचिव सुरज भट्टराईले र स्वागत मन्तव्य कार्यकारिणी सदस्य प्रेम लामिछानेले गर्नुभएको थियो। धन्यवाद ज्ञापनसहित आफ्नो मन्तव्य राख्दै स्वराज अभियन्ता एवं उपाध्यक्ष केशवप्रसाद चौलागाईंले पृथ्वीको तापक्रम वृद्धि तथा बाढी-पहिरोका कारणहरूबारे प्रकाश पार्नुभयो। उहाँले पृथ्वीको तापक्रम बढ्नुमा ब्रह्माण्डमा रहेको ‘डार्क इनर्जी’ र विस्तार भइरहेको ब्रह्माण्ड पनि कारण रहेको धारणा राख्नुभयो। साथै मानव निर्मित कार्बन डाइअक्साइड उत्सर्जन गर्ने उद्योगहरू जिम्मेवार रहेकाले प्रकृतिमाथि भइरहेको हिंसा रोक्नुपर्नेमा उहाँको जोड थियो।

गान्धीसँगै बसेर नेपाल फर्किएका संस्थापक तुलसीमेहरले झैँ आफूहरूले पनि गान्धी दर्शनलाई द्वन्द्व व्यवस्थापन र महिला हिंसा उन्मूलनजस्ता अनुसन्धान तथा कार्यक्रममार्फत नवीनता दिन सकेको उहाँले बताउनुभयो। गान्धीले उठाउनुभएको स्वराज्यको भावना ऋग्वेदको सिद्धान्त र सत्यको भावना वाल्मीकि रामायणमा आधारित रहेको उल्लेख गर्दै उहाँले यसको शास्त्रीय आधारसमेत स्पष्ट पार्नुभएको थियो।

कार्यक्रमले बदलिँदो सामाजिक परिवेशमा गान्धीका सत्य, अहिंसा, सद्भाव र मानवताका विचारलाई नयाँ पुस्तासम्म पुर्‍याउने तथा शान्तिपूर्ण समाज निर्माणमा योगदान गर्ने प्रतिबद्धता व्यक्त गरेको छ।