काठमाडौँ : बंगालको खाडीमा विकसित शक्तिशाली चक्रवात ‘अर्नब’का कारण आज देशका विभिन्न भागमा मौसम प्रभावित भई केही स्थानमा भारी वर्षा र हिमपातको सम्भावना देखिएको छ।
जल तथा मौसम विज्ञान विभागका अनुसार चक्रवातको अप्रत्यक्ष प्रभावले कोशी, बागमती, गण्डकी र लुम्बिनी प्रदेशका एक दुई स्थानमा मुसलधारे वर्षाको जोखिम छ। दिउँसो कोसी, मधेस, वाग्मती, गण्डकी, कर्णाली र सुदूरपश्चिम प्रदेशका हिमाली भेगमा साधारणतया बदली रहनेछ भने बाँकी भूभागमा आंशिक बादली लाग्ने मौसम पूर्वानुमान महाशाखाले जनाएको छ।
विशेष गरी उच्च हिमाली तथा पर्वतीय क्षेत्रमा यात्रा गर्दा सतर्कता अपनाउन मौसमविद्ले आग्रह गरेका छन्। कोशी र बागमती प्रदेशका हिमाली क्षेत्रका केही स्थानका साथै बाँकी हिमाली भूभागका थोरै ठाउँमा मध्यम वर्षा र हिमपातको सम्भावना रहेकाले चिसो बढ्ने र जनजीवन प्रभावित हुनसक्ने अनुमान गरिएको छ। मौसममा आएको यो अचानक फेरबदलका कारण सम्भावित जोखिमबाट बच्न आवश्यक सतर्कता अपनाउन विभागले अनुरोध गरेको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |