काठमाडौँ : सामाजिक सञ्जाल टिकटकलाई मनोरञ्जनमा मात्र सीमित नराखी पर्यटन प्रवर्द्धन, उद्यमशीलता र रोजगारी सिर्जनाको माध्यम बनाउने विषयमा नेपाल सरकार र टिकटकबीच छलफल भएको छ।
सूचना तथा सञ्चारमन्त्री डा.विक्रम तिमिल्सिना र टिकटकका सरकारी सम्बन्ध तथा सार्वजनिक नीति मामिलासम्बन्धी वरिष्ठ निर्देशक एमिर गेलेनबीच भएको भेटवार्तामा डिजिटल रूपान्तरण, आर्थिक विकास र सुरक्षित इन्टरनेट प्रयोगमा सहकार्यका सम्भावनाबारे छलफल भएको हो।
भेटमा मन्त्री तिमिल्सिनाले नेपाली कला, संस्कृति र पर्यटनलाई विश्वव्यापी रूपमा चिनाउन डिजिटल प्लेटफर्मको प्रभावकारी उपयोग गर्नुपर्ने बताए। डिजिटल अवसरलाई सहरमा मात्र सीमित नराखी ग्रामीण क्षेत्रका नागरिक, साना उद्यमी र विपन्न समुदायसम्म विस्तार गर्नुपर्नेमा उनले जोड दिए।
डिजिटल साक्षरता, प्रयोगकर्ताको गोपनीयता र सुरक्षित इन्टरनेट प्रयोग सरकारको प्राथमिकतामा रहेको उल्लेख गर्दै उनले विपद्का बेला सूचना तथा जनचेतनामूलक सन्देश प्रवाहमा सामाजिक सञ्जालको भूमिका महत्त्वपूर्ण हुने बताए।
जवाफमा टिकटकका वरिष्ठ निर्देशक गेलेनले नेपाली व्यापार, पर्यटन र संस्कृतिको अन्तर्राष्ट्रिय प्रवर्द्धन तथा डिजिटल साक्षरता अभिवृद्धिमा सहकार्य गर्न टिकटक इच्छुक रहेको बताए। सुरक्षित इन्टरनेट प्रयोगसम्बन्धी जनचेतना अभियानमा पनि सरकारसँग सहकार्य गर्ने उनको प्रतिबद्धता थियो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |