काठमाडौं : यातायात व्यवसायीहरूले सोमबारदेखि देशभर अनिश्चितकालीन सार्वजनिक यातायात बन्दको घोषणा गरेका छन्। बन्दका कारण आज बिहानैदेखि काठमाडौं उपत्यकालगायत देशका विभिन्न स्थानमा जनजीवन प्रभावित बनेको छ भने यात्रुहरू मारमा परेका छन्।
नेपाल यातायात स्वतन्त्र मजदुर संगठनका अनुसार ‘सार्वजनिक यातायात बचाउ केन्द्रीय संघर्ष समिति’ को आह्वानमा सार्वजनिक सवारीसाधनहरू ग्यारेजमै थन्क्याएर सेवा बन्द गरिएको हो।
बन्दको मुख्य कारण गण्डकी प्रदेश सरकारले ल्याएको ‘राइड सेयरिङ’ सम्बन्धी नियमावली रहेको संगठनको दाबी छ। उक्त नियमावलीले निजी प्रयोजनका लागि खरिद गरिएका सवारीसाधनलाई भाडाका सवारीसरह सञ्चालन गर्न दिने व्यवस्था गरेको भन्दै संगठनले आपत्ति जनाएको छ।
संगठनले यसअघि सम्बन्धित निकायलाई ध्यानाकर्षण पत्र बुझाएर नियमावली खारेजीको माग गर्दै समस्या समाधानका लागि पहल गर्न आग्रह गरेको थियो। तर, सुनुवाइ नभएको भन्दै अन्ततः अनिश्चितकालीन आन्दोलनको बाटो रोजिएको जनाइएको छ।
