सुनचाँदी व्यवसायीको आन्दोलन स्थगित, सरकारसँग ६ बुँदे सहमति

काठमाडौं : सरकारसँग ६ बुँदे सहमति भएपछि सुनचाँदी व्यवसायीहरूले करिब एक महिनादेखि जारी राखेको आन्दोलन स्थगित गरेका छन्।

बिहीबार अर्थ मन्त्रालयमा भएको वार्तामा सहमति जुटेपछि आज शुक्रबारदेखि देशभरका सुनचाँदी पसलहरू नियमित रूपमा खुल्ने भएका छन्। नेपाल सुनचाँदी व्यवसायी महासंघका द्वितीय उपाध्यक्ष धर्मसुन्दर बज्राचार्यले विरोधका कार्यक्रमहरू स्थगित गरिएको बताए ।

आर्थिक वर्ष २०८२÷८३ को बजेटमार्फत सुनको कारोबारमा २ प्रतिशत विलासिता कर र हीरा जडित गरगहनामा १३ प्रतिशत भ्याट लगाउने व्यवस्था गरेपछि व्यवसायीहरू आन्दोलित भएका थिए। यो व्यवस्थाले उपभोक्ता र व्यवसायी दुवैलाई असर पार्ने भन्दै उनीहरूले कर र भ्याट खारेजीको माग गर्दै पसलहरू बन्द गरेका थिए, जसका कारण सुनचाँदीको दैनिक भाउ समेत तोकिएको थिएन। बिहीबारको वार्तामा व्यवसायीका मागहरू सम्बोधन गर्न एक कार्यदल गठन गर्ने सहमति भएको छ।

यो कार्यदलले विलासिताको परिभाषाभित्र राखिएको सुन तथा सुनका गरगहनाको सन्दर्भमा आवश्यक अध्ययन गरी पुनरावलोकनका लागि सिफारिस गर्नेछ। महत्वपूर्ण कुरा, कार्यदलले अध्ययन प्रतिवेदन पेस नगरेसम्म बजेटमार्फत वृद्धि भएको कर र भ्याट लागू नहुने मौखिक सहमति भएको बज्राचार्यले बताएका छन्, यद्यपि यो बुँदा सहमति पत्रमा भने उल्लेख छैन।