नारायणगढ : सुनचाँदी व्यवसायीहरूले सरकारको बजेटमार्फत सुनमा लगाइएको विलासिता कर र भ्याटको विरोधमा सुरु गरेको आन्दोलन चितवनमा कूटनीतिक संवादमार्फत सशक्त बन्दै गएको छ। आन्दोलनमात्र नभई राजनीतिक तहमा पनि दबाब सृजना गर्न व्यवसायीहरू सक्रिय देखिएका छन्।
शुक्रबार चितवन क्षेत्र नंवर १ का प्रतिनिधिसभा सदस्य तथा राष्ट्रिय स्वतन्त्र पार्टीका सांसद हरि ढकालको उपस्थितिमा सुनचाँदी व्यवसायी संघ चितवनले कूटनीतिक छलफल कार्यक्रम आयोजना गर्यो। संघका वरिष्ठ उपाध्यक्ष उत्सव खातीको पहलकदमीमा आयोजित कार्यक्रम संघीय दबाब सिर्जना गर्न र संसदमार्फत आवाज बुलन्द गर्न लक्षित थियो।
कार्यक्रममा उद्योग वाणिज्य संघ चितवनका वरिष्ठ उपाध्यक्ष चिरञ्जीवी सुवेदी, पूर्वअध्यक्ष राजन गौतम, रास्वपाका जिल्ला अध्यक्ष कृष्णप्रसाद भुसाल, उपभोक्ता मञ्च चितवनका वरिष्ठ उपाध्यक्ष प्रेमप्रसाद गैरे लगायतको उपस्थिति रहेको थियो।
वक्ताहरूले सुनजस्तो बहुप्रयोगी धातुलाई विलासिताको वर्गीकरणमा राखेर कर लगाउनु अनुचित भएको धारणा राखे। उनीहरूले यस्तो करले व्यवसाय मात्रै होइन, उपभोक्ता पनि मारमा पर्ने भन्दै संसदमा यसको विरोध हुनुपर्ने माग गरे।
कार्यक्रममा नेपाल सुनचाँदी व्यवसायी महासंघका पूर्वउपाध्यक्ष एवं चितवन सल्लाहकार ज्ञानेन्द्रमान शाक्य, पूर्वकेन्द्रीय सदस्य चित्रबहादुर खाती, निवर्तमान अध्यक्ष टेकबहादुर विश्वकर्मा, टुलुक विश्वकर्मा, ऋतु सेन्चुरीलगायतको सहभागिता थियो।
संघका अध्यक्ष हेमबहादुर विश्वकर्माको अध्यक्षतामा सम्पन्न भएको छलफल कार्यक्रममा महासचिव गोपाल थापा विकले सञ्चालन गरेका थिए।
सुनमा भ्याट र विलासी कर हटाउन माग गर्दै व्यवसायीहरू देशैभर आन्दोलित छन्। चितवनको यो प्रयासले आन्दोलनलाई कूटनीतिक तहमा समेत प्रभावकारी ढंगले अघि बढाइएको संकेत दिएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |