झापा : नेकपा (एमाले)का अध्यक्ष केपी शर्मा ओलीले आफूविरुद्ध चुनावी प्रतिस्पर्धा गर्न चाहने विपक्षी उम्मेदवारहरूलाई डरत्रास नमान्न र ढुक्क भएर मैदानमा उत्रिन सुझाव दिएका छन्। एमाले अरुजस्तो डरको राजनीति नगर्ने उनको दाबी छ।
सोमबार गृहजिल्ला झापा पुगेका ओलीले दमकमा आयोजित पत्रकार भेटघाटमा चर्चा बटुल्नकै लागि आफूविरुद्ध उम्मेदवारी दिन चाहनेहरू देखिएको उल्लेख गर्दै चुनावी प्रतिस्पर्धालाई स्वाभाविक रूपमा लिएको बताए। “प्रतिस्पर्धा हो, डराउने कुरा छैन,” उनले भने, “ढुक्क भएर आउनुस्।”
ओलीले झापामा शिक्षा, स्वास्थ्य, खानेपानीलगायत पूर्वाधार क्षेत्रमा असाधारण विकास भएको दाबी गरे। कृषिको आधुनिकीकरण, उद्योग स्थापनाको अन्तिम तयारी र योजनामार्फत रोजगारी सिर्जनाका लागि यान्त्रीकरण अघि बढाइएको उनले बताए।
एमालेबाहेक अन्य दलसँग विकासको स्पष्ट योजना नै नरहेको टिप्पणी गर्दै ओलीले वर्तमान सरकार देशलाई चाहिएको शान्ति सुरक्षाको सवालमा उदासिन देखिएको आरोप लगाए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |