गाजामा दोस्रो दिन पनि इजरायली आक्रमण

काठमाडौं :  इजरायली सेनाले गाजा सिटीमा लगातार दोस्रो दिन पनि आक्रमण जारी राखेको छ । शनिबार सुसी टावर लक्षित आक्रमणपछि भवनहरु ध्वस्त भएको इजरायलका रक्षा मन्त्री इस्राएल कात्जले सामाजिक सञ्जाल ‘एक्स’ मा भिडियो सार्वजनिक गर्दै भनेका छन् ।

इजरायलले भवनलाई हमास प्रयोग गर्दै आएको दाबी गरेको छ भने हमासले आरोप अस्वीकार गरेको छ। यस आक्रमणमा मानवीय क्षतिको विवरण भने सार्वजनिक भइसकेको छैन।

यसअघि शुक्रबार गाजाको अल-रिमाल क्षेत्रमा रहेको मुश्ताहा टावर आक्रमणपछि भत्किएको थियो। स्थानीय अधिकारीले विस्थापित परिवारहरू त्यहाँ आश्रय लिइरहेको बताउँदै इजरायलमाथि ‘बलपूर्वक विस्थापन’को आरोप लगाएका छन्।

इजरायली सेनाले आक्रमणअघि पर्चा खसाल्दै सर्वसाधारणलाई दक्षिणतर्फको अल–मवासी क्षेत्रतर्फ जान आग्रह गरेको थियो। तर संयुक्त राष्ट्रसंघले अल–मवासीका शिविरहरू भीडभाडयुक्त र असुरक्षित भएको, अस्पतालहरू पनि अत्यधिक चापमा परेको जनाएको छ। गत सातामात्रै पानीको लाइनमा उभिएका पाँच बालबालिकाको ज्यान गएको घटनाबारे इजरायलले समीक्षा भइरहेको जनाएको थियो।

७ अक्टोबर २०२३ मा हमासले दक्षिण इजरायलमा आक्रमण गरी करिब १२०० जनाको ज्यान लिएपछि इजरायलले गाजामा सैन्य अभियान सुरु गरेको हो। त्यसयता गाजामा ६३ हजारभन्दा बढीको मृत्यु भएको हमास नियन्त्रित स्वास्थ्य मन्त्रालयको दाबी छ। तीमध्ये ३६७ जनाको मृत्यु कुपोषण र भोकमरीका कारण भएको मन्त्रालयले जनाएको छ।

संयुक्त राष्ट्रसंघले गाजा सिटीमा अझै करिब १० लाख मानिस रहेको र त्यहाँ भोकमरी घोषणासहित आसन्न ‘मानवीय विपत्ति’को चेतावनी दिएको छ।