जयवीर देउवालाई सात दिनभित्र उपस्थित हुन सम्पत्ति शुद्धीकरणको निर्देशन

काठमाडौँ :  पूर्वप्रधानमन्त्री शेरबहादुर देउवाका छोरा जयवीर देउवालाई सम्पत्ति शुद्धीकरण अनुसन्धान विभागले बयानका लागि सात दिनभित्र उपस्थित हुन निर्देशन दिएको छ। विभागले सार्वजनिक सूचना जारी गर्दै सम्पत्ति शुद्धीकरणसम्बन्धी अनुसन्धानका क्रममा केही विषयमा सोधपुछ गर्नुपर्ने भएकाले कार्यालयमा उपस्थित हुन भनेको हो।

विभागका अनुसार सम्बन्धित पूर्जी भदौ आन्दोलनका क्रममा क्षति पुगेको देउवा निवासमा टाँसिएको छ। जेनजी आन्दोलनपछि देउवा परिवार सम्पत्ति शुद्धीकरणसम्बन्धी अनुसन्धानको दायरामा परेको हो।

यसअघि देउवा दम्पतीले उपचारका सिलसिलामा विदेशमा रहेकाले साउन २६ गते नेपाल फर्किने जानकारी विभागलाई पत्रमार्फत गराएका थिए। जयवीर पनि हाल परिवारसँगै विदेशमै रहेको बताइएको छ।

जयवीरमाथि शक्तिको आडमा आफ्नो व्यवसाय विस्तार गर्न प्रभावको दुरुपयोग गरेको आरोप लाग्दै आएको छ। उनीमाथि नेपाल टेलिकमको बिलिङ (महसुल गणना) ठेक्का र पासपोर्ट (राहदानी) छपाइ ठेक्कासम्बन्धी अनियमिततामा संलग्न रहेको भन्दै सम्पत्ति शुद्धीकरण अनुसन्धान विभाग र अख्तियारमा उजुरीसमेत परेको छ।