काठमाडौँ : जेनजी आन्दोलनपछि थला परेको सेयर बजार साताको पहिलो कारोबार दिन उच्च अंकले उकालो लागेको छ। लगातारको गिरावटपछि नेप्से परिसूचक आइतबार १ सय ११ दशमलव ७० अंकले वृद्धि भई २ हजार ६२३ दशमलव ६२ विन्दुमा पुगेको छ।
गत बिहीबार ६ प्रतिशतले घटेको बजार आज पुनः सुधारको संकेत दिँदै ४.४४ प्रतिशत ले उकालो लागेको हो। कारोबार रकम पनि झिनो सुधार देखाउँदै ९ अर्ब नाघेको छ, जुन पछिल्लो केही महिनामा दुर्लभ देखिएको परिदृश्य हो।
नेपाल स्टक एक्सचेन्जका अनुसार, आइतबार ३२९ कम्पनीको २ करोड ३२ हजार कित्ता शेयर १ लाख ८ हजार ९०८ पटक किनबेच हुँदा कुल कारोबार रकम ९ अर्ब १७ करोड ९५ लाख ७३ हजार रुपैयाँ पुगेको छ।
बजारमा लगानीकर्ताको मनोबल फर्किन थालेको संकेत दिँदै १६ स्टक सकारात्मक सर्किट लेभलमा कारोबार भएका छन्। तीमध्ये सिन्धु विकास बैंक, भुगोल इनर्जी डेभलपमेन्ट, गुडविल फाइनान्स, शिवम् सिमेन्ट्स, जोशी हाइड्रोपावर लगायत अग्रणी रहेका छन्।
कारोबार रकमका आधारमा नेपाल पुनर्बीमा कम्पनी शीर्ष स्थानमा देखिएको छ। सो कम्पनीको ८३ करोड १३ लाख रुपैयाँबराबरको शेयर किनबेच भएको हो।
१३ उपसमूहमध्ये ११ उपसमूहको परिसूचक हरियो रहँदा, व्यापार उपसमूह सर्वाधिक ८।६६ प्रतिशतले उकालो लागेको छ। बाँकी दुई उपसमूह भने केही अंशले ओरालो लागेका छन्।
लगातार ओरालो लागिरहेको बजारमा आइतबारको उछाललाई विश्लेषकहरूले प्राविधिक सुधारु मात्र नभई विश्वासको पुनर्स्थापना को संकेतसमेत मानेका छन्।
