काठमाडौँ : निजामती विधेयकको विवादपछि राज्य व्यवस्था समितिबाट राजीनामा दिएका नेपाली कांग्रेसका सांसद रामहरी खतिवडा संसदीय सुनुवाइ संयुक्त समितिको सभापति निर्विरोध निर्वाचित भएका छन्।
शुक्रबार साँझ बसेको समितिको बैठकमा कांग्रेसका प्रमुख सचेतक श्यामकुमार घिमिरेले खतिवडाको नाम प्रस्ताव गरे। नेकपा एमालेका प्रमुख सचेतक महेशकुमार बर्तौलाले त्यसमा समर्थन जनाएपछि ज्येष्ठ सदस्य पशुपतिशमशेर जबराले खतिवडालाई निर्विरोध सभापति घोषणा गरेका हुन्।
खतिवडा हालै निजामती सेवा विधेयकमा ‘कुलिङ पिरियड’ सम्बन्धी प्रावधान हटाउने संशोधन पारित गराउने क्रममा आलोचना खेप्दै राज्य व्यवस्था तथा सुशासन समितिको सभापतिबाट राजीनामा दिएका थिए।
सुनुवाइ समितिको सभापति चयन हुन नसक्दा लामो समयदेखि संवैधानिक अंगहरूमा नियुक्ति प्रक्रिया रोकिएको थियो। खतिवडाको चयनसँगै सुनुवाइ प्रक्रिया अघि बढ्ने बाटो खुलेको छ।
सुनुवाइ समिति २६ सदस्यीय छ । यसमा कांग्रेस, एमाले, माओवादी केन्द्र, र अन्य दलका सांसदहरूको प्रतिनिधित्व रहेको छ। समितिको सभापति सर्वसम्मतिमा चयन गर्ने पछिल्लो सहमतिका आधारमा खतिवडाले नयाँ जिम्मेवारी पाएका हुन्।
