काठमाडौं : गृहमन्त्री ओमप्रकाश अर्यालले पुराना दलका प्रमुख नेताहरूमाथि समेत कानुनी कारबाही हुन सक्ने संकेत दिएका छन्। मन्त्रीपरिषद् बैठकपछि बिहीबार पत्रकारहरूसँग कुरा गर्दै उनले आवश्यक परे पासपोर्ट रोक्का गर्ने वा पक्राउ गर्ने प्रक्रियासम्म अघि बढ्न सक्ने स्पष्ट पारे।
पत्रकारले आन्दोलनका दोषीहरूलाई सरकारले कसरी कारबाही गर्छ भन्ने प्रश्न सोध्दा गृहमन्त्रीले अनुसन्धान निकाय सक्रिय भइसकेको बताए। ‘कानूनमा जे–जे लेखिएको छ, त्यही हुन्छ,’ उनले भने, ‘पक्राउ, बयान, रोक्का सबै अनुसन्धानकै भाग हो।’
उनका अनुसार सरकारले गठन गरेको आयोगले निस्पक्ष रूपमा तथ्य उजागर गर्नेछ र त्यही आधारमा सरकार अघि बढ्नेछ। न्यायाधीशको नेतृत्वमा रहेको उक्त आयोगलाई मन्त्रीस्तरको प्रोटोकल दिइएको छ।
तत्कालीन सरकारका प्रमुखसम्म कारबाहीको दायरामा पर्न सक्ने प्रश्नमा उनले प्रत्यक्षै टालटुल नगरी, ‘पर्छन् नि’ भन्दै सम्भावना औंल्याए।
