काठमाडौं : जेन–जेड पुस्ताको आन्दोलनमाथि सरकारले गरेको बल प्रयोग र बर्बरतापूर्ण दमनप्रति विरोध जनाउँदै राष्ट्रिय स्वतन्त्र पार्टी (रास्वपा) ले प्रधानमन्त्री केपी शर्मा ओलीको राजीनामा माग गरेको छ।
आइतबार बसेको पार्टी सचिवालय बैठकपछि जारी विज्ञप्तिमा भनिएको छ, वर्तमान सरकारको औचित्य पूर्णतः समाप्त भइसकेको परिप्रेक्ष्यमा प्रधानमन्त्रीको तत्काल राजीनामा माग गर्दछौँ। विज्ञप्ति पार्टी महामन्त्री कविन्द्र बुर्लाकोटीले जारी गरेका हुन्।
रास्वपाले आन्दोलनका क्रममा भएको मानवीय क्षति र अत्यधिक बल प्रयोगप्रति गम्भीर आपत्ति जनाउँदै घटनाको निष्पक्ष छानबिनका लागि उच्चस्तरीय न्यायिक छानबिन आयोग गठन गर्न माग गरेको छ। साथै, सो घटनामा संलग्न सबै दोषीमाथि विशेषतः गृहमन्त्रीसहित कडा कारबाहीको माग समेत गरिएको छ।
विज्ञप्तिमा भनिएको छ, जवाफदेही विहीन नेतृत्व, प्रतिपक्षको कमजोर भूमिका, र असंवेदनशील प्रशासनका कारण अहिलेको सत्ता संरचना जनताको विश्वास गुमाउँदै गएको छ।
रास्वपाले संघीय संसदले कुनै पनि राष्ट्रिय मुद्दाको समाधान दिन नसकेको भन्दै संसदको वैधता माथि प्रश्न उठाएको छ। विज्ञप्तिमा भनिएको छ, ूनेपाली कांग्रेस र नेकपा एमालेको वर्चस्व रहेको वर्तमान संघीय संसदले राष्ट्रिय सरोकारका विषयमा निर्णायक भूमिका खेल्न असमर्थ देखिएको छ, त्यसैले अब ताजा जनादेश अपरिहार्य भएको छ।
पार्टीले शान्तिपूर्ण आन्दोलनको अधिकारमाथि गरिएको दमनलाई लोकतान्त्रिक मूल्य विपरीत भनेको छ। शान्तिपूर्ण रूपमा सडकमा उत्रिएको पुस्तालाई गोली र लाठीले होइन, संवाद र सम्वेदनशीलताले जवाफ दिनुपर्छ, विज्ञप्तिमा भनिएको छ।
रास्वपा पहिलो पटक आन्दोलनको सम्बन्धमा यस्तो स्पष्ट राजनीतिक र कठोर प्रतिक्रिया दिने दल बनेको हो। अन्य प्रमुख दलहरू—नेपाली कांग्रेस र नेकपा एमाले—बाट औपचारिक धारणा आउन बाँकी छ।
