वायु प्रदुषण बढेपछि सावधानी अपनाउन स्वास्थ्य मन्त्रालयको आग्रह

काठमाडौँ : वायु प्रदूषण बढ्दै गएपछि स्वास्थ्य तथा जनसङ्ख्या मन्त्रालयले सावधानी अपनाउन सर्वसाधारणलाई आग्रह गरेको छ। मन्त्रालयका प्रवक्ता डा. प्रकाश बुढाथोकीले काठमाडौँ उपत्यकामा वायु प्रदूषण उच्च भएकाले सम्भव भएसम्म बिहान–बेलुका बाहिर ननिस्कन र निस्कनै परे मास्क प्रयोग गर्न भनेका हुन् ।

वायु प्रदूषणले मुटु, रक्तनली, फोक्सो, दम, क्यान्सर, आँखा तथा मिर्गौलासम्बन्धी समस्या बढाउने जोखिम हुन्छ। विशेषगरी बालबालिका, ज्येष्ठ नागरिक, श्वासप्रश्वाससम्बन्धी दीर्घरोगी र गर्भवती महिलामा यसको असर बढी देखिने भएकाले ती समूहलाई विशेष सावधानी अपनाउन मन्त्रालयले आग्रह गरेको छ।

पुराना सवारीसाधनबाट निस्कने धुवाँ, वनडढेलो, उद्योगधन्दा तथा निर्माण सामग्रीबाट उठ्ने धुलोधुवाँका कारण प्रदूषण बढेको प्रवक्ता बुढाथोकीले बताए। मन्त्रालयका अनुसार काठमाडौँमा अझै करिब एक सातासम्म प्रदूषणको प्रभाव रहने सम्भावना छ।

वातावरण विभागले पनि मौसमी प्रतिकूलताका कारण देशका विभिन्न स्थानमा वायु प्रदूषण बढ्दै गएको जनाएको छ। विशेषगरी काठमाडौँ, पोखरालगायत ठूला सहरमा सूक्ष्म कणको मात्रा बढेको विभागको भनाइ छ।