काठमाडौं : नेपाली कांग्रेसका महामन्त्री गगनकुमार थापाले विधानअनुसार विशेष महाधिवेशन नबोलाइए आफू चुप लागेर नबस्ने चेतावनी दिएका छन्।
पार्टी कार्यालय सानेपामा शुक्रबार बसेको केन्द्रीय कार्यसम्पादन समितिको बैठकपछि सञ्चारकर्मीसँग कुरा गर्दै उनले विधानको पालना नभए केन्द्रीय कार्यालयको अधिकार प्रयोग गरेर विशेष महाधिवेशन आयोजना गरिने बताए।
बैठकले विशेष महाधिवेशनबारे कुनै प्रस्ताव नगरेपछि आफूहरूले फरक मत दर्ता गराएको थापाको भनाइ छ। “फरक मत दर्ता गरेर घर गएर सुत्ने होइन,” उनले भने, “एक–दुई दिनभित्र केन्द्रीय कार्यसमिति बैठक बसेर विशेष महाधिवेशनको निर्णय भयो भने राम्रो हुन्छ, नभए विधानको धारा १७ कार्यान्वयन हुन्छ।”
महामन्त्री थापाले देशभरका नेता–कार्यकर्तालाई विशेष महाधिवेशनमा सहभागी हुन आह्वान गरे। केन्द्रीय कार्यसमितिले महाधिवेशन बोलाए कार्यविधि पनि उसैले बनाउने र बैठक नबसे विशेष महाधिवेशनले आफैं कार्यविधि तय गर्ने उनले बताए।
पार्टी फुटको हल्ला नगर्न आग्रह गर्दै थापाले कुनै पनि परिस्थितिमा कांग्रेस नफुट्ने दाबी गरे।
