सप्तकोशीको बहाव घट्दो, खतराको चेतावनी अझै कायमै

काठमाडौँ :  सप्तकोशी नदीको जलसतहमा क्रमिक सुधार आए पनि कटान र जोखिमको सम्भावना भने अझै टरेको छैन। मङ्गलबार बिहान ११ : १५ बजेको मापनअनुसार कोशी ब्यारेज भएर १ लाख ६६ हजार २६५ क्युसेक पानी बहाव भएको छ ।

गए रातिको तुलनामा यो परिमाण केही कम भए पनि नदी अझै खतराको बिन्दुभन्दा माथि नै बहिरहेको कोशी परियोजनाले जनाएको छ। जलसतह केही घट्न थालेपछि ब्यारेजका ढोकाहरू बन्द गर्न थालिएको छ। यसअघि पानीको निकासका लागि २६ वटा ढोका खोलिएकामा अहिले घटाएर २० वटा मात्र खुला राखिएको छ।

नदीमा पानीको आयतन केही घटेकाले तटीय क्षेत्रका बासिन्दालाई थोरै राहत मिलेको छ, तर जोखिम पूर्ण रूपमा नटरेकाले सतर्कता अपनाउन स्थानीय प्रशासनले आग्रह गरेको छ। पहाडी तथा जलाधार क्षेत्रमा निरन्तर भइरहेको वर्षाका कारण सप्तकोशीमा जलसतह जुनसुकै बेला फेरि बढ्न सक्ने भन्दै तटीय बस्तीहरूमा उच्च निगरानी राखिएको छ।