८४ मा एमालेको बहुमत आउँछ : केपी ओली

काठमाडौं :  प्रधानमन्त्री तथा नेकपा एमालेका अध्यक्ष केपी शर्मा ओलीले लिपुलेकको विषय भारतसँग वार्ता गरेर समाधान खोजिने बताएका छन्। शुक्रबार ललितपुरमा सुरु भएको एमालेको दोस्रो विधान महाधिवेशन उद्घाटन गर्दै उनले सीमा समस्यालाई भारतसँग छलफलमार्फत टुंग्याउने धारणा राखे।

ओलीले भारत–चीनबीच लिपुलेक हुँदै व्यापारिक सम्झौता हुँदा आफूले चिनियाँ राष्ट्रपति सी जिनपिङसमक्ष असहमति जनाइसकेको दाबी गरे। राष्ट्रियताको पक्षमा उभिँदा केहीले गलत व्याख्या गरेका छन्,उनले भने, ‘हामी राष्ट्रिय हितमाथि सम्झौता गर्दैनौं ‘।

उनले चीनको ग्लोबल सेक्युरिटी इनिसिएटिभ सम्बन्धी प्रस्तावमा नेपालले कुनै प्रतिक्रिया नदिएको स्पष्ट गरे।

महाधिवेशनमा ओलीले पार्टीको राजनीतिक प्रतिवेदन प्रस्तुत गरेका छन्। उनले विधान महाधिवेशन विधान केन्द्रित हुने बताए। पार्टीभित्र केही अनावश्यक विषयहरू संवेदनशील रूपमा उठाइएका छन्, तर तिनीहरू विधानसँग सम्बन्धित छैनन्, उनले भने।

उनले कांग्रेससँगको सहकार्यपछि मुलुकमा स्थायित्व आएको र माओवादीको ‘म्याजिक नम्बर’ को भ्रम हटेको बताए। जनताबीच पुगेर अझ विश्वास जित्न सके २०८४ सालको निर्वाचनमा एमालेलाई बहुमत आउने दाबी पनि उनले गरे।

तीन दिनसम्म चल्ने महाधिवेशनमा राजनीतिक प्रतिवेदन, विधान संशोधन र अन्य दस्तावेजमाथि छलफल हुनेछ। कुल २ हजार ३४१ प्रतिनिधिको सहभागिता रहेको छ।