काठमाडौं : राजसंस्थाको पुनःस्थापना र हिन्दु राष्ट्रको माग गर्दै आन्दोलनमा उत्रिएका राजावादीहरूको आइतबारको प्रदर्शन उग्र बन्दा राप्रपा, नेपालका अध्यक्ष कमल थापा सहित पाँच जनालाई प्रहरीले नियन्त्रणमा लिएको छ।
प्रदर्शनकारी समूह नारायणचौरबाट जुलुस निकालेर बालुवाटारतर्फ अघि बढ्ने क्रममा सरकारले तोकेको निषेधित क्षेत्र भित्र पस्न खोजेपछि भिड नियन्त्रण गर्न प्रहरीले हस्तक्षेप गरेको हो। यस क्रममा ब्यारियर तोड्ने प्रयास भएपछि कमल थापासहित अन्य चार जनालाई पक्राउ गरिएको प्रहरीले जनाएको छ।
आन्दोलनको पृष्ठभूमि
राजसंस्था पुनःस्थापनाको माग गर्दै राजावादीहरूले १५ जेठदेखि अनिश्चितकालीन आन्दोलन सुरु गरेका छन्। शनिबार रत्नपार्कमा भएको प्रदर्शनमा ठूलो जनसहभागिता देखिएको थियो। आइतबार पनि नारायणचौरबाट बालुवाटारतर्फ जुलुस निकालिएको थियो।
सरकारले प्रधानमन्त्री, सभामुखलगायतको निवास रहेको बालुवाटार क्षेत्रलाई निषेधित क्षेत्र घोषणा गरिसकेको छ। तर, प्रदर्शनकारीहरूले सो क्षेत्रतर्फ जबर्जस्ती अघि बढ्न खोजेको प्रहरीको भनाइ छ।
आन्दोलन जारी
प्रदर्शनकारीहरूले राजसंस्था फर्काउनुपर्ने र नेपाललाई पुनः हिन्दु राष्ट्र घोषणाका लागि जनदबाब आवश्यक रहेको तर्क गर्दै आन्दोलनलाई निरन्तरता दिने बताएका छन्। प्रहरीले भने शान्तिपूर्ण आन्दोलनको अधिकार सबैलाई भए पनि सार्वजनिक सुरक्षा र कानुनी व्यवस्थाको उल्लङ्घन गर्न पाइँदैन भन्ने चेतावनी दिएको छ।
