दोहा : कतार प्रवेश गर्दा वा कतारबाट बाहिरिँदा नियन्त्रित (Controlled) औषधि साथमा ल्याउने वा लैजाने यात्रुले अब अनिवार्य रूपमा अनलाइन अनुमति (ई–परमिट) लिनुपर्ने भएको छ। कतारको स्वास्थ्य मन्त्रालयले विद्युतीय अनुमति प्रणाली लागू गरेसँगै यस्तो व्यवस्था कार्यान्वयनमा आएको हो।
स्वास्थ्य मन्त्रालयका अनुसार अनुमति लिन चिकित्सकको सिफारिस, चिकित्सकीय प्रतिवेदन, औषधिको विवरण तथा अन्य आवश्यक कागजात मन्त्रालयको अनलाइन प्रणालीमार्फत पेश गर्नुपर्नेछ। आवेदन स्वीकृत भएपछि जारी हुने अनुमति पत्र ९० दिनसम्म मान्य रहनेछ। यात्राका क्रममा अनुमति पत्रसँगै औषधिको मूल चिकित्सकीय सिफारिस र चिकित्सकीय प्रतिवेदन पनि अनिवार्य रूपमा साथमा राख्नुपर्नेछ।
मन्त्रालयका अनुसार आवेदन दिएको तीन कार्यदिनभित्र अनुमति जारी गरिनेछ। त्यसैले यात्रा गर्नुअघि कम्तीमा पाँच दिनअघि नै आवेदन दिन सबै यात्रुलाई आग्रह गरिएको छ।
विशेष निगरानी (Controlled Medicines) मा पर्ने Morphine, Oxycodone, Fentanyl, Pethidine, Methadone, उच्च मात्रा भएका केही Codeine, Diazepam (Valium), Alprazolam (Xanax), Clonazepam (Rivotril), Lorazepam, Bromazepam, Zolpidem, Methylphenidate (Ritalin, Concerta), Lisdexamfetamine, Tramadol, Tapentadol तथा Benzodiazepine समूहका धेरै निद्रा र शान्त पार्ने औषधि साथमा ल्याउन वा लैजान ई–परमिट अनिवार्य हुनेछ।
यद्यपि Amlodipine, Losartan, Telmisartan जस्ता रक्तचापका औषधि, Metformin लगायत मधुमेहका औषधि, थाइराइडका औषधि, सामान्य एन्टिबायोटिक तथा Paracetamol र Ibuprofen जस्ता सामान्य ज्वरो र दुखाइका औषधि सामान्यतया ई–परमिटबिना लैजान सकिने मन्त्रालयले जनाएको छ। तर कुनै औषधि नियन्त्रित सूचीमा पर्छ वा पर्दैन भन्ने विषयमा यात्रा गर्नुअघि कतारको स्वास्थ्य मन्त्रालयबाट यकिन गर्न विज्ञहरूले सुझाव दिएका छन्।
अन्तर्राष्ट्रिय मानवअधिकार संगठन कतार च्याप्टरका अध्यक्ष प्रोफेसर मोहम्मद रमजान अली मियाँका अनुसार, विगतमा आवश्यक जानकारीको अभावका कारण केही नेपाली यात्रुले चिकित्सकले सिफारिस गरेका औषधि साथमा ल्याउँदा पनि तीमध्ये केही औषधि कतारको Controlled Medicines सूचीमा परेकाले विमानस्थलमा सोधपुछ, औषधि जफत तथा कानुनी प्रक्रियासमेत सामना गर्नुपरेको गुनासो आउने गरेको थियो। स्वास्थ्य मन्त्रालयले लागू गरेको नयाँ ई–परमिट प्रणालीले यस्ता अनाहकका समस्या न्यूनीकरण गर्न सहयोग पुग्ने अपेक्षा गरिएको उनले बताए।
उनका अनुसार कतारमा बसोबास गर्ने नेपालीहरूले अझै पनि नेपालबाट विभिन्न औषधि मगाउने चलन व्यापक छ। विशेषगरी दुखाइ कम गर्ने, ग्यास्ट्रिक, रक्तचाप, मधुमेह तथा खोकीका औषधि नेपालबाट मगाइने गरेको पाइन्छ। यद्यपि यस्ता औषधिमध्ये केही मात्र नियन्त्रित सूचीमा पर्न सक्छन्, त्यसैले कुनै पनि औषधि ल्याउनुअघि सम्बन्धित नियमबारे यकिन गर्न आवश्यक रहेको उनले बताए।
प्रोफेसर मियाँले कतारमा हेल्थ कार्ड बनाएका सेवाग्राहीले सामान्य उपचारका लागि आवश्यक अधिकांश औषधि सरकारी PHCC (Primary Health Care Corporation) का स्वास्थ्य केन्द्रबाट निकै सुलभ शुल्कमा प्राप्त गर्न सक्ने भएकाले अनावश्यक रूपमा नेपालबाट औषधि मगाउनुभन्दा स्थानीय स्वास्थ्य सेवाको उपयोग गर्न पनि आग्रह गरेका छन्।
यसैबीच,कतारको सार्वजनिक स्वास्थ्य मन्त्रालय (MOPH) ले सबै स्वास्थ्य संस्था तथा स्वास्थ्यकर्मीहरूलाई खाद्यजन्य रोग (Foodborne Illness) को शंका लागेका वा पुष्टि भएका सबै घटनाहरू पहिचान भएको २४ घण्टाभित्र मन्त्रालयको SAVES विद्युतीय प्रतिवेदन प्रणालीमार्फत अनिवार्य रूपमा जानकारी गराउन निर्देशन दिएको छ।
मन्त्रालयका अनुसार समयमै प्रतिवेदन प्राप्त हुँदा जनस्वास्थ्यसम्बन्धी आवश्यक कदम तत्काल चाल्न, सम्भावित प्रकोपलाई नियन्त्रण गर्न तथा समुदायको स्वास्थ्य सुरक्षा सुनिश्चित गर्न सहयोग पुग्छ। मन्त्रालयले प्रतिवेदनसम्बन्धी यो अनिवार्य व्यवस्था पालना नगरे कानुनी कारबाहीसमेत हुन सक्ने चेतावनी दिएको छ।
अनलाइन अनुमतिको लागि
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |