सुन तोलामा २४ सयले घट्यो, चाँदीको मूल्य स्थिर

नेपाली बजारमा साताको दोस्रो दिन सुनको मूल्यमा ठूलो गिरावट आएको छ। आइतबारको तुलनामा सोमबार सुन तोलामा २ हजार ४ सय रुपैयाँले घटेर प्रतितोला ३ लाख ६ हजार ६ सय रुपैयाँमा झरेको नेपाल सुनचाँदी व्यवसायी महासंघले जनाएको छ । आइतबार प्रतितोला ३ लाख ९ हजार रुपैयाँमा सुनको कारोबार भएको थियो।

सुनको भाउमा गिरावट आए पनि चाँदीको मूल्य भने फेरबदल भएको छैन। महासंघले सोमबारका लागि चाँदीको भाउ प्रतितोला ४ हजार ७ सय ८० रुपैयाँ निर्धारण गरेको छ, जुन अघिल्लो दिनकै मूल्य हो। महासंघका अनुसार अन्तर्राष्ट्रिय बजारमा हुने उतारचढावकै आधारमा दैनिक रूपमा नेपाली बजारमा सुनचाँदीको कारोबार दर तय गरिँदै आएको छ।