काठमाडौँ : सरकारले दर्ता नभएका सामाजिक सञ्जाल बन्द गर्ने निर्णयसँगै एलन मस्कको स्वामित्वमा रहेको ‘एक्स’ (पूर्व ट्विटर) नेपाल सरकारको सम्पर्कमा आएको छ।
सूचना तथा सञ्चार प्रविधि मन्त्रालयले शुक्रबार एक्स कम्पनीले सूची दर्ताका लागि आवश्यक कागजातबारे चासो देखाउँदै औपचारिक सम्पर्क गरेको जानकारी दिएको हो। मन्त्रालयका प्रवक्ता गजेन्द्र कुमार ठाकुरका अनुसार मन्त्रालयले आवश्यक प्रक्रिया र कागजातको विवरण पठाइसकेको छ।
यसअघि सरकारले सर्वोच्च अदालतको आदेश र मन्त्रिपरिषद्को निर्णयअनुसार दर्ता नभएका २६ वटा सामाजिक सञ्जाल बन्द गर्न निर्देशन दिएको थियो। निर्देशनपछि दूरसञ्चार प्राधिकरणले इन्टरनेट सेवा प्रदायकहरूलाई ती प्लेटफर्म निष्क्रिय पार्न आदेश दिएको हो।
नेपाल दूरसञ्चार प्राधिकरणका प्रवक्ता मिनप्रसाद अर्यालका अनुसार १०८ वटा इन्टरनेट सेवा प्रदायकमध्ये झन्डै सय वटा संस्थाले फेसबुकलगायतका प्लेटफर्म निष्क्रिय गरिसकेको जनाएका छन्। साथै, प्राधिकरणले अनुगमन टोली खटाएर निगरानी बढाएको छ।
तर, सामाजिक सञ्जाल बन्दको निर्णयलाई लिएर राजनीतिक दलभित्रैदेखि मानव अधिकार आयोगसम्मले आलोचना गरेका छन्। आयोगले सरकारलाई निर्णय पुनर्विचार गर्न विज्ञप्तिमार्फत आग्रह गर्दै बन्दको साटो वैकल्पिक व्यवस्थापन उपाय अपनाउन सुझाव दिएको छ।
यसबीच, कतिपय प्रयोगकर्ताले भिपिएन प्रयोग गरी प्रतिबन्धित प्लेटफर्म चलाइरहेको देखिएको छ। प्रविधि विज्ञहरूका अनुसार यो विधि प्रयोग गर्दा डेटा सुरक्षामा खतरा उत्पन्न हुन सक्छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |