काभ्रेपलाञ्चोकको मण्डनदेउपुर नगरपालिका-१२ ज्याम्दीस्थित इन्द्रावती नदीमा टिपरले च्याप्दा एक युवकको मृत्यु भएको छ। मृत्यु हुनेमा पाँचखाल नगरपालिका घर भएका १९ वर्षीय देबेन्द्र तामाङ रहेका छन्।
प्रहरीका अनुसार गएराति करिब ९ बजे नदी क्षेत्रमा रहेका दुई टिपरबीच परेर तामाङको ज्यान गएको हो। घटनापछि चालक फरार रहेका छन् भने तामाङको शव धुलिखेल अस्पतालमा राखिएको छ।
प्रारम्भिक अनुसन्धानबाट तामाङ रातिको समयमा नदीबाट बालुवा निकाल्ने कार्यमा संलग्न रहेका बेला दुर्घटनामा परेको देखिएको प्रहरीले जनाएको छ। घटनाको वास्तविक कारण र परिस्थितिबारे थप अनुसन्धान भइरहेको छ।
इन्द्रावती नदीबाट नदीजन्य पदार्थ उत्खनन गर्न कानुनी प्रतिबन्ध रहे पनि रातिको समयमा अवैध रूपमा बालुवा तथा गिट्टी उत्खनन र ओसारपसार हुने गरेको स्थानीयवासीको गुनासो छ। तामाङको मृत्युको घटनाले अवैध उत्खनन नियन्त्रणमा सम्बन्धित निकायको निगरानी र कारबाही प्रभावकारी बनाउनुपर्ने आवश्यकता फेरि उजागर गरेको छ। प्रहरीले फरार चालकको खोजीका साथै घटनाबारे थप अनुसन्धान गरिरहेको जनाएको छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |