काठमाडौँ : नेकपा एमालेको निर्वाचन समीक्षा तथा पार्टी पुनर्गठन कार्यदलको बैठक च्यासलस्थित केन्द्रीय कार्यालयमा सुरु भएको छ। सहमति जुट्न नसकिरहेका बेला बसेको यस बैठकलाई पार्टी पुनर्गठनको विषयमा निर्णायक मानिएको छ।
आजको बैठकमा अध्यक्ष केपी शर्मा ओलीको निर्देशनमा नेता प्रदीप ज्ञवालीले तयार पारेको २९ पृष्ठको छुट्टै प्रतिवेदनसमेत छलफलका लागि प्रस्तुत हुँदै छ। ज्ञवाली कार्यदलका सदस्य होइनन्। उनले तयार पारेको प्रतिवेदनमा महासचिव शंकर पोखरेलको प्रतिवेदनमा रहेको ‘नेतृत्व परिवर्तन’सम्बन्धी मूल विषय हटाइएको छ। त्यसको सट्टा ओलीको भूमिकाको बचाउ गर्दै पराजयको दोष व्यक्ति विशेषलाई मात्र दिन नसकिने निष्कर्ष निकालिएको छ।
यसअघि संयोजक रामबहादुर थापा ‘बादल’ र सदस्य सचिव पोखरेलले तयार पारेका छुट्टाछुट्टै प्रतिवेदनमा सहमति हुन सकेको थिएन। पुनर्गठन पक्षधर नेताहरूले ज्ञवालीको प्रतिवेदन अस्वीकार गर्दै पोखरेलकै प्रतिवेदनलाई आधार बनाएर अघि बढ्नुपर्ने अडान राखेका छन्।
कार्यदलमा पुनर्गठन पक्षधरको बहुमत रहेको दाबी गरिए पनि मत विभाजनको वास्तविक अवस्था आजको निर्णयले स्पष्ट पार्नेछ। आज सहमति नजुटे विवादित विषय सचिवालय र केन्द्रीय कमिटी बैठकमा जानेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |