काठमाडौँ : विश्वकप २०२६ को तेस्रो स्थानका लागि भएको रोमाञ्चक प्रतिस्पर्धामा इंग्ल्यान्डले फ्रान्सलाई ६-४ ले पराजित गर्दै प्रतियोगिताको तेस्रो स्थान सुरक्षित गरेको छ।
गोलको वर्षा भएको खेलमा इंग्ल्यान्डले पहिलो हाफमै ४-० को बलियो अग्रता बनाएको थियो। डेक्लान राइस, एज्री कोन्सा र बुकायो साकाको दुई गोलमा इंग्ल्यान्ड सहज अवस्थामा पुगे पनि दोस्रो हाफमा फ्रान्सले किलियन एम्बाप्पेको दुई तथा ब्राड्ली बार्कोलाको एक गोलमा खेललाई ४-३ सम्म पुर्यायो। ८७ औं मिनेटमा साकाले पेनाल्टीमार्फत ह्याट्रिक पूरा गर्दै इंग्ल्यान्डलाई राहत दिलाए। इन्जुरी समयमा ओस्मान डेम्बेलेले अन्तर घटाए पनि खेल सकिनुअघि जुड बेलिङहमले गोल गर्दै ६-४ को जित सुनिश्चित गरे।
१० गोल भएको यो खेल विश्वकप इतिहासमा तेस्रो स्थानका लागि भएको खेलमध्ये सर्वाधिक गोल भएको कीर्तिमान बनेको छ। पराजयका बाबजुद एम्बाप्पेले दुई गोल थप्दै विश्वकप इतिहासमा सर्वाधिक २२ गोल गर्ने खेलाडी बने। उनी १० गोलसहित गोल्डेन बुट दौडमा पनि अग्रस्थानमा छन् भने ८ गोल गरेका लियोनल मेसीसँग फाइनलमा उनलाई उछिन्ने अवसर बाँकी छ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |