चक्रवात ‘अर्नब’ को असरले देशभर वर्षा र हिमपात

काठमाडौँ :  बङ्गालको खाडीमा विकसित चक्रवात ‘अर्नब’ को अवशेष र पश्चिमी वायुको दोहोरो प्रभावका कारण शनिबार देशभरको जनजीवन प्रभावित भएको छ। मौसम पूर्वानुमान महाशाखाका अनुसार कोशी, मधेश, बागमती, गण्डकी र लुम्बिनी प्रदेशका धेरै स्थानमा मध्यम तथा अन्य क्षेत्रमा हल्का वर्षा भइरहेको छ।

खराब मौसमलाई मध्यनजर गर्दै महाशाखाले पाकेको धानबाली काट्ने तथा भित्र्याउने काम आज र भोलि नगर्न किसानहरूलाई अपिल गरेको छ । उच्च हिमाली तथा पहाडी भूभागमा भारी हिमपात र हिमपहिरोको जोखिम रहेकाले पर्यटकहरूलाई सुरक्षित स्थानमा रहन र सतर्कता अपनाउन आग्रह गरिएको छ।

वर्षासँगै बढेको चिसोले दैनिक जनजीवनका साथै हवाई र सडक यातायात समेत प्रभावित भएको छ। भोलि (आइतबार) अपराह्नदेखि यो मौसमी प्रणाली कमजोर हुँदै जाने महाशाखाले जनाएको छ।