’एक चेतनाको यात्रा : शक्तिपुत्रजी महाराजको नेपाल आगमन’

कृष्ण न्यौपाने :  त्रिभुवन विमानस्थलको बुधबारको विहानी…शहर चलायमान हुन खोज्दै थियो । विमानस्थलको गेटमा माँ र ॐ लेखिएका ध्वजा बोकेर मानिसहरु जय माता कि जय गुरुवर कि भन्दै कसैको पर्खाइमा थिए । विमानस्थल बाहिरको दृश्य साँच्चै असाधारण थियो । बाजागाजाको धुन, सेतो पहिरनमा सुसज्जित भक्तजनहरूको उत्साही स्वर, अनि ’शक्तिपुत्रजी महाराज की जय!’को ध्वनी गुन्जिरहेको थियो ।

बुधबार बिहान लगभग १० बजेको यो दिन सामान्य थिएन । नेपालको माटोले एउटा अनौठो अध्यात्मिक ऊर्जा स्पर्श गरिरहेको थियो । ऋषिराज शक्तिपुत्रजी महाराज । ध्यान, योग, नशामुक्ति र चेतनाको अग्रदूत, पहिलोपटक नेपालको भूमिमा टेक्दै थिए ।
सयौँको अनुहारहरूमा एक किसिमको आस्था थियो, जुन बजारको धुलोभन्दा माथि, सहरको भीडभन्दा अलग एक किसिमको भरोसा बोकेको देखिन्थ्यो।

शक्तिपुत्रजी महाराजको आगमन केवल एउटा धार्मिक कार्यक्रम मात्र होइन, नशामुक्त नेपाल र समृद्ध चेतनाको सपना बोकेको यात्राको सुरुवात थियो । विमानस्थलबाट महाराजको सवारी पशुपतिनाथ क्षेत्रस्थित होटल आनन्दतर्फ अघि बढ्यो । सडक छेउछाउ, जताततै साधकहरूको जयजयकार, फुलमाला । त्यो यात्रा कुनै सवारी यात्रा थिएन… त्यो यात्रा थियो चेतनाको यात्रामा अग्रसर भैरहेको एउटा उत्सव ।
कार्यक्रमको आयोजक भगवती मानव कल्याण संगठनका महासचिव अजय अवस्थीको अनुहारमा देखिएको आत्मविश्वास, उस्तै थियो । उनी विश्वासका साथ भन्दै थिए“नेपालको अध्यात्मिक यात्रा आज नयाँ मोडमा पुगेको छ। सिद्ध योगिको सान्निध्यले नेपाली समाजमा सकारात्मक परिवर्तन ल्याउनेछ।“महाराज केवल शिविरको प्रमुख थिएनन्, उनी त त्यो प्रकाश थिए, जुन नशाको अन्धकारबाट मुक्ति खोजिरहेका हजारौं नेपालीहरूका लागि आशाको किरण बन्न सक्थ्यो।

शिविर आगामी जेठ २ र ३ गते । सजिलो शब्दमा भन्दा, साधनाको दुई दिन। तर वास्तवमा त्यो दुई दिन । कुनै कालखण्ड होइन, एक युगको सुरुवात थियो । योग, ध्यान, चेतनाको सत्र;र दुर्गा भवानीको दिव्य आरतीले सहरलाई आध्यात्मिक उज्यालोले धपक्कै बनाउने छ ।
शिविरको दोस्रो दिन – गुरुदीक्षा कार्यक्रम, जहाँ साधकहरूले शक्तिपुत्रजी महाराजबाट अध्यात्मिक अनुशासनको बीज रोप्नेछन् । त्यहाँ निःशुल्क शक्तिजल वितरण गरिनेछ ।

संगठनले ५ हजार भन्दा बढी नेपालीहरूलाई नशामुक्त बनाइसकेको छ । देशभर चलिरहेको ’एक वृक्ष – राष्ट्रको नाममा’ अभियानले सामाजिक चेतना र हरियाली दुवैलाई आत्मसात गर्दैछ । नेपालमा शक्तिपुत्रजी महाराजको आगमन, सिर्फ एउटा ऋषिको यात्रा होइन । यो एक देशको चेतनाको पुनर्जागरण हो । त्यो चेतना, पाशुपत क्षेत्रमा मात्र होइन, सम्पूर्ण नेपालमा एउटा लहर बन्दै फैलिने संकेत गर्दैथियो ।