काठमाडौं : अन्तर्राष्ट्रियस्तरको राष्ट्रसेवा, शक्ति साधना तथा नशामुक्ति शिविर काठमाडौंको पशुपतिनाथ मन्दिर परिसरमा सम्पन्न भएको छ।
राष्ट्रसेवा, शक्ति साधना तथा नशामुक्ति शिविरमा सहभागीहरु
भगवती मानव कल्याण संगठनद्वारा आयोजित यस शिविरमा करिब ३ हजार ५ सय व्यक्तिहरूले नशामुक्त हुने प्रण गरेका छन् । उक्त शिविरमा योगिराज शक्तिपुत्रजी महाराजले शक्तिपातको माध्यमबाट सहभागीहरूलाई नशामुक्त गर्नुभयो । भविष्यवक्ता समेत रहनुभएका महाराजले शिविरमा निकट भविष्यमा भयानक विश्वयुद्ध हुने भविष्यवाणी गर्नुभयो। उहाँका अनुसार सो युद्धले विश्वको नक्सा नै बदलिनेछ र कयौं देशहरूको अस्तित्व समाप्त हुनेछ।
नेपालबारे बोल्दै महाराजले नेपाल सधैं स्वतन्त्र, स्वाभिमानी र गौरवशाली राष्ट्रका रूपमा रहने बताउनुभयो। नेपाल र भारत सनातन धर्मको उद्गमभूमि भएकोले विश्वभर धर्म, अध्यात्म र शान्तिको सन्देश फैलाउने भूमिकामा रहेको उहाँको भनाइ थियो। त्यसका लागि ऋषि मार्गमा अघि बढ्ने साधक तयार पार्न आवश्यक रहेको उहाँले उल्लेख गर्नुभयो।
शिविरमा शक्तिचेतना जनजागरण कार्यक्रम अन्तर्गत सहभागीहरूलाई ११ वटै संकल्प गराइयो। ती संकल्पमा नशामुक्त जीवन, मांसाहार त्याग, चरित्रवान र चेतनाशील बन्ने, वातावरण र गौमाताको संरक्षण, तथा गलत कर्म नगर्ने र नकर्तालाई समर्थन नगर्ने प्रतिबद्धता समेटिएका थिए।
महाराजले नेपालमा मौलाउँदै गएको भ्रष्टाचारलाई रोक्नुपर्नेमा जोड दिनुभयो। नेपालले भ्रष्टाचारका कारण अपेक्षित प्रगति गर्न नसकेको भन्दै अब भ्रष्टाचार उन्मूलनका लागि भारत सरकारसँग पनि सहकार्यको अपिल गर्नुभयो। भारत र नेपाल सरकार मिलेर संयुक्त प्रयासबाट भ्रष्टाचार अन्त्य गर्नुपर्ने उहाँको धारणा थियो।
त्यस्तै, उहाँले आत्मिक रूपान्तरणका लागि नेपाली जनसमुदायलाई लक्षित गर्दै विशेष ‘कुण्डलिनी शक्ति साधना’ कार्यक्रम संचालन गर्ने योजना पनि सार्वजनिक गर्नुभयो। साधना मार्फत साधकहरूलाई अनुभूतिको यात्रामा अघि बढाउने प्रतिवद्धता उहाँले व्यक्त गर्नुभयो।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |