गणतन्त्र पक्षधर एकजुट भए राजावादी समाप्त : प्रचण्ड

काठमाडौं : नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले गणतन्त्र पक्षधर सबै शक्ति एकजुट भएमा राजावादी धारको प्रभाव समाप्त हुने बताएका छन्।

नुवाकोटको सूर्यगढी गाउँपालिका–३ स्थित वागेश्वरी माध्यमिक विद्यालयको हीरक जयन्ती समारोहलाई सम्बोधन गर्दै उनले शिक्षा क्षेत्रका समस्याबारे पनि बोले। उनका अनुसार सरकारले अझै शिक्षा क्षेत्रमा आवश्यक बजेट विनियोजन गर्न नसकेको छ।

“अघिल्लो कार्यकालमा म प्रधानमन्त्री हुँदा जोडबलले शिक्षा विधेयक संसदमा पेश भएको हो,” उनले भने, “शिक्षकहरूसँग भएको सहमतिअनुसार विधेयक पारित हुनुपर्छ।”

प्रचण्डले सरकारको नेतृत्वमा रहेका व्यक्तिहरू जनताको भावना अनुसार नचलेको भन्दै जनस्तरमा असन्तुष्टि बढेको उल्लेख गरे।

“जनतामा देखिएको आक्रोश गणतन्त्रप्रति होइन,” उनले भने, “कतिपय नेताहरूले भ्रष्टाचार र विभेद गर्नेहरूको संरक्षण गर्न खोज्दा जनता वाक्क भएका छन्। आर्थिक समृद्धि अपेक्षाअनुसार हुन सकेको छैन, तर यो आक्रोश नेतृत्वप्रति हो, प्रणालीप्रति होइन।”

उनले नेपाली जनता फेरि वंशवादी शासन प्रणालीमा फर्कने पक्षमा नरहेको स्पष्ट पार्दै भने, “नेपाललाई गरिब बनाउने, हत्या र बलात्कार गर्नेहरूले फेरि आएर देश बनाउँछन् भन्नेमा कुनै सत्यता छैन।”

शान्ति सम्झौता र गणतन्त्रको पक्षमा रहेका शक्तिहरू एक ठाउँमा आउनासाथ राजावादीहरूको अस्तित्व सकिने उनले दाबी गरे। यद्यपि गणतन्त्रवादी नेताहरूको व्यवहारका कारण जनतामा प्रश्न उठेको भए पनि राजावादी धारबाट तत्काल कुनै खतरा नरहेको उनको भनाइ छ।