काठमाडौं : इन्डियन प्रिमियर लिग (आईपीएल) २०२५ को क्वालिफायर–२ मा पञ्जाब किंग्सले मुम्बई इन्डियन्सलाई ५ विकेटले पराजित गर्दै ११ वर्षपछि फाइनलमा स्थान बनाएको छ।
आइतबार अहमदाबादस्थित नरेन्द्र मोदी रंगशालामा भएको खेलमा पञ्जाबले मुम्बईले दिएको २०४ रनको लक्ष्य १९ ओभरमै ५ विकेट गुमाएर पूरा गर्यो।
कप्तान श्रेयसले अन्तिमतिर छक्का प्रहार गर्दै टोलीलाई जित दिलाए। उनले ४१ बलमा नटआउट ८७ रनको विस्फोटक इनिङ्स खेले, जसमा ५ चौका र ८ छक्का समावेश थिए। उनको उत्कृष्ट प्रदर्शनका लागि ‘प्लेयर अफ द म्याच’ घोषित गरियो।
श्रेयसको साथ दिँदै नेहल वधेराले ४८ रन र जोश इन्ग्लिसले ३८ रनको योगदान दिए। बलिङतर्फ अश्विनी कुमारले २ विकेट लिए।
यसअघि, टस हारेर पहिले ब्याटिङ गरेको मुम्बई इन्डियन्सले निर्धारित २० ओभरमा ६ विकेटको क्षतिमा २०३ रन बनाएको थियो। मुम्बईका तिलक वर्मा र सूर्यकुमार यादवले समान ४४–४४ रन बनाएका थिए भने जोनी बेयरस्टोले ३८ रनको योगदान दिएका थिए। पञ्जाबका लागि अजमतुल्लाह उमरजाईले २ विकेट लिएका थिए।
अब पञ्जाब किंग्सले फाइनल खेलमा रोयल च्यालेन्जर्स बैंगलोरको सामना गर्नेछ। फाइनल खेल आगामी जुन ३ मा हुनेछ।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |