अमेरिकामा दुई बालबालिकासहित चार नेपाली मृत फेला

काठमाडौं :  अमेरिकाको भर्जिनिया राज्यस्थित म्यानेसस पार्क भन्ने ठाउँमा दुई बालबालिकासहित चार नेपाली नागरिक मृत अवस्थामा फेला परेका छन्। प्रारम्भिक जानकारीअनुसार उनीहरूको मृत्यु गोली लागेर भएको आशंका गरिएको छ।

मृतकहरू ३८ वर्षीय सन्तोष परियार, ३६ वर्षीया अञ्जु श्रेष्ठ, एक जना २ वर्षे बालक, र ८ वर्षीीया बालिका रहेका छन्। चारै जना एउटै परिवारका हुन् वा होइनन् भन्ने कुरा हालसम्म पुष्टि भएको छैन। प्रहरी अनुसन्धान जारी छ।

घटना विवरण

म्यानेसस पार्क प्रहरी विभागका अनुसार, बिहीबार राति करिब १०स्४० बजे, घरधनीले भाडामा बस्ने व्यक्तिहरूको सुरक्षा जाँच गरिदिन अनुरोध गरेपछि प्रहरी टोली घटनास्थलमा पुगेको थियो। घरको तल्लो तलामा प्रवेश गर्दा चार जना व्यक्तिलाई मृत अवस्थामा फेला पारिएको हो।

प्रहरीले घटनास्थलबाट एक थान बन्दुक पनि बरामद गरेको छ। सबै शवहरू म्यानेससस्थित मेडिकल एक्जामिनरको कार्यालयमा परीक्षणका लागि पठाइएको छ। प्रहरीले हालसम्म घटनाको प्रकृति हत्या हो कि आत्महत्या भन्नेबारे पुष्टि गरेको छैन। यसबारे अनुसन्धान जारी रहेको बताइएको छ।