गभर्नर पौडेलको सम्पत्ति विवरण : घरजग्गादेखि सुन, हिरा, सेयरसम्म

काठमाडौं : नेपाल राष्ट्र बैंकका गभर्नर विश्वनाथ पौडेलले सार्वजनिक सम्पत्ति विवरणमा घर, सुन, हिरा, लाखौं रुपैयाँ मौज्दात, सेयर तथा गाडीको उल्लेख गरेका छन्।

राष्ट्र बैंकको गभर्नर पदमा नियुक्त भएपछि बुझाइएको विवरणअनुसार, पौडेल दम्पतीको नाममा ललितपुर र नवलपरासीमा घर तथा जग्गा, ४५ तोला सुन, १५ लाख रुपैयाँ बराबरको हिराका गहना, २० लाख ६८ हजार रुपैयाँभन्दा बढी मौज्दात तथा १५ लाखभन्दा बढी कित्ता सेयर÷ऋणपत्र रहेको छ।

पौडेलकी श्रीमती प्रतिभा शर्माको नाममा ललितपुरको सैंबु र नवलपरासी गैंडाकोटमा एक÷एकवटा घर तथा जग्गा छ। त्यस्तै, ४५ तोला सुन र १५ लाख बराबरका हिराका गहना रहेको विवरणमा उल्लेख छ। दुवैको नाममा विभिन्न बैंक, वित्तीय संस्था तथा सहकारीहरूमा जम्मा २० लाख ६८ हजार ९०५ रुपैयाँ मौज्दात छ। साथै, ४ हजार ५१३ अमेरिकी डलर विदेशी बैंक खातामा भएको उल्लेख छ। गभर्नर पौडेलले विभिन्न सात वटा कम्पनीमा करिब १५ लाख ३६ हजार ५८९ कित्ता सेयर लगानी गरेका छन्।

ती कम्पनीहरूमा सानिमा बैंक, सानिमा माइ हाइड्रोपावर, सानिमा मिडल तमोर, ग्लोबेको प्रालि, संयुक्त उर्जा, चितवन इनर्जी लिमिटेड लगायत छन्। पौडेलको नाममा प्रवर्द्धक र साधारण दुवै खालका सेयर रहेको उल्लेख छ। श्रीमती प्रतिभा शर्माको नाममा ४४ लाख रुपैयाँ बराबरको सुजुकी ब्रान्डको गाडी रहेको छ। उक्त गाडी पुराना गाडी बिक्री र स्वआर्जित रकमबाट खरिद गरिएको विवरणमा उल्लेख छ।

पौडेलको नाममा कुनै बैंक वा संस्थागत ऋण नरहेको पनि सम्पत्ति विवरणमा उल्लेख छ। गभर्नरका रूपमा नियुक्त भएपछि पौडेलले गरेको सम्पत्ति विवरण पारदर्शिता र जवाफदेहिता कायम गर्न सकारात्मक अभ्यासको रूपमा लिइएको छ।