काठमाडौं : दक्षिण कोरियामा रोजगारीका लागि जान चाहने नेपाली श्रमिकहरूका लागि सूचना पहुँच र सेवा प्रवाहलाई सरल, सहज र भरपर्दो बनाउने उद्देश्यसहित ‘हामी मोबाइल एप’ सार्वजनिक गरिएको छ।
कोरियाली सरकारको आर्थिक सहयोगमा विकास गरिएको यो एप नेपाल सरकार, श्रम, रोजगार तथा सामाजिक सुरक्षा मन्त्रालयको सहकार्यमा सञ्चालन हुनेछ। शुभारम्भ कार्यक्रम बिहीबार काठमाडौंमा आयोजित विशेष समारोहमा श्रममन्त्री शरतसिंह भण्डारीको प्रमुख आतिथ्यतामा सम्पन्न भयो।
कार्यक्रममा बोल्दै मन्त्री भण्डारीले ‘हामी मोबाइल एप’ को सुरुआतसँगै श्रम बजारमा डिजिटल प्रविधिको प्रयोग बढाउँदै पारदर्शिता, जवाफदेहिता र प्रभावकारी सेवा प्रवाहमा सुधार ल्याउने सरकारको उद्देश्य रहेको बताए। उनले श्रमिकहरूलाई लक्षित गर्दै एपमा रोजगारीसम्बन्धी आवश्यक सूचना, सीप विकास, वित्तीय योजना, मानसिक स्वास्थ्य सहयोगजस्ता विषय समावेश गरिएको जानकारी दिए। एप नेपाली र अंग्रेजी दुवै भाषामा प्रयोगकर्तामैत्री इन्टरफेसका साथ उपलब्ध हुने छ।
नेपालका लागि कोरियाली राजदूत पार्क थेयङले नेपाली श्रमिकहरूका लागि सूचना र मार्गदर्शन अत्यावश्यक रहेको उल्लेख गर्दै यो एपले डिजिटल माध्यमबाट श्रमिकहरूको आवश्यकता पूरा गर्न मद्दत गर्ने विश्वास व्यक्त गरे।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |