सावधान यस वर्ष ६० हजारभन्दा बढीमा डेँगु संक्रमण हुने जोखिम

काठमाडौं : साउनदेखि कात्तिक महिनासम्म देशभर डेँगु संक्रमणको उच्च जोखिम रहने भन्दै स्वास्थ्य तथा जनसंख्या मन्त्रालयले सतर्कता अपनाउन सबैमा आग्रह गरेको छ।

इपिडिमियोलोजी तथा रोग नियन्त्रण महाशाखा (इडिसीडी) ले सोमबार आयोजना गरेको अन्तरक्रिया कार्यक्रममा डेँगुको संक्रमण यस वर्ष ६० हजारभन्दा बढीमा देखिन सक्ने पूर्वानुमान सार्वजनिक गरेको हो। महाशाखाको किटजन्य शाखा प्रमुख डा. गोकर्ण दाहालका अनुसार हालसम्म देशका ७३ जिल्लामा १६ सयभन्दा बढी डेँगुका संक्रमण पुष्टि भइसकेका छन्।

डा. दाहालका अनुसार अहिले नै पूर्वतयारी नगर्ने हो भने साउनदेखि कात्तिकको अन्त्यसम्म संक्रमण विस्फोट हुन सक्छ। संक्रमण फैलिनुअघि नै स्थानीय तह, स्वास्थ्यकर्मी र नागरिकको सहकार्य अनिवार्य रहेको उनले स्पष्ट पारे। महाशाखाले सम्भावित संक्रमणलाई मध्यनजर गर्दै नियन्त्रण तथा न्यूनीकरण कार्ययोजना बनाइसकेको जानकारी दिएको छ। सबैभन्दा ठूलो भूमिका स्थानीय तहको हुने भन्दै उनले फोहोर व्यवस्थापन, ट्यांकी र अन्य पानी जम्मा हुने ठाउँको सरसफाइमा ध्यान दिन आग्रह गरिएको छ ।