बनेपा–नाला–भक्तपुर सडकखण्ड पूर्णरूपमा अवरुद्ध

बनेपा :  अरनिको राजमार्गको प्रमुख वैकल्पिक मार्ग बनेको बनेपा–नाला–भक्तपुर सडकखण्ड पूर्णरूपमा अवरुद्ध भएको छ। काभ्रे जिल्लास्थित पुण्यमाता खोलामा निर्माण गरिएको पुल रातिको समयमा भाँचिएपछि सवारी आवागमन पूर्णतः बन्द भएको हो।

बनेपा नगरपालिका वडा नम्बर १ र ४ को सीमाना पर्ने सो पुल भाँचिएपछि यातायातका सबै साधन वैकल्पिक मार्ग प्रयोग गर्न बाध्य भएका छन्। काभ्रे जिल्ला ट्राफिक प्रमुख प्रहरी निरीक्षक सुनील ध्वाजुले पुल भत्किएसँगै सडक अवरुद्ध भएको जानकारी दिए।

धुलिखेल–सुर्यविनायक खण्डको विस्तारका कारण पहिल्यैदेखि मूल राजमार्ग अवरुद्ध छ, वैकल्पिक रूपमा प्रयोग भइरहेको बनेपा–नाला–भक्तपुर सडक पनि बन्द हुँदा सम्पूर्ण अरनिको राजमार्ग प्रयोग हुने यात्रुहरू समस्यामा परेका छन्।

स्थानीयवासी तथा यात्रुहरू आवतजावतमा कठिनाइ व्यहोर्न बाध्य भएका छन् भने आपतकालीन सेवाहरू समेत प्रभावित भएका छन्। पुलको भत्किएको भाग तत्काल मर्मत नभएसम्म आवागमन सम्भव नहुने प्राविधिकहरू बताउँछन्।

स्थानीय प्रशासनले वैकल्पिक समाधान खोज्न तत्काल पहल थाल्नुपर्ने अवस्था आएको छ। पुल पुनर्निर्माण नहुँदासम्म काभ्रे हुँदै काठमाडौं ओहोरदोहोर गर्ने यातायातमा थप समस्या पर्ने देखिएको छ।