नेप्सेमा सामान्य सुधार, कारोबार रकम भने खुम्चियो

काठमाडौं :  साताको पहिलो कारोबार दिन आइतबार नेप्से परिसूचक सामान्य अंकले उकालो लाग्दा कारोबार रकम भने केही घटेको देखिएको छ।

नेप्से परिसूचक २.४० अंकले बढेर २७०६.३६ विन्दुमा पुगेको नेपाल स्टक एक्सचेञ्ज (नेप्से)ले जनाएको छ । गत बिहीबार ९ अर्ब ६४ करोड रुपैयाँभन्दा बढीको कारोबार भएकोमा आइतबार भने २४९ स्टकको २ करोड ७१ लाख ३२ हजार ३०८ कित्ता सेयर ९ अर्ब ५० करोड रुपैयाँ बराबरमा खरिदबिक्री भयो । यस दिन नेपाल फाइनान्सको सेयर सकारात्मक सर्किट लेभलमा पुगेको छ। कम्पनीको सेयरमूल्य ६९ रुपैयाँ ४० पैसा बढेर ७६३ रुपैयाँ ६० पैसामा बन्द भएको छ। गुडविल फाइनान्स डिबेञ्चरको मूल्य ८.८७ प्रतिशतले घट्दा ग्रिन डेभलपमेन्ट बैंक र सिन्धु विकास बैंकका सेयर मूल्य क्रमशः ८.५८ र ५.८१ प्रतिशतले गिरावट आएका छन् ।

कारोबार रकमका आधारमा नेपाल रि इन्स्योरेन्स कम्पनी शीर्ष स्थानमा रह्यो। कम्पनीको ४९ करोड ४० लाख रुपैयाँको सेयर किनबेच भयो। उपसमूह हेर्दा १३ मध्ये ७ उपसमूहको परिसूचक हरियो रहँदा ६ उपसमूहको परिसूचक रातो देखिएको छ। अन्य उपसमूह ३.०६ प्रतिशतले, वित्त उपसमूह २.४९ प्रतिशतले उकालो लाग्दा विकास बैंक, हाईड्रोपावर र जीवन बीमा उपसमूह १ प्रतिशतभन्दा बढीले घटेका छन् ।