हेटौँडा : बागमती प्रदेशको नेतृत्व सम्हालेका मुख्यमन्त्री इन्द्रबहादुर बानियाँले शुक्रबार मन्त्रीपरिषद् पूर्ण गरेका छन्।
पाँच मन्त्री थप नियुक्त गर्दै उनले मन्त्रिपरिषद्को सदस्य संख्या १४ पुर्याएका हुन्। आर्थिक मामिला तथा योजना मन्त्रालयमा प्रभातकुमार तामाङ, सामाजिक विकासमा कञ्चनचन्द्र बादे, सहकारी तथा गरिबी निवारणमा बिनु रायमाझी, संस्कृति तथा पर्यटनमा सुरेश श्रेष्ठ र युवा तथा खेलकुदमा उर्मिला केसीलाई जिम्मेवारी दिइएको छ।
शिवराज अधिकारीलाई आन्तरिक मामिला तथा कानुनको जिम्मा तोकिएको छ। प्रदेश प्रमुख दीपकप्रसाद देवकोटासमक्ष शपथ खाएका नवनियुक्त मन्त्रीहरूमध्ये एमालेको भागमा परेको ६ मन्त्रालयमा मन्त्री नियुक्त भइसकेका छन्। कांग्रेसतर्फबाट खानेपानी, ऊर्जा तथा सिँचाइमन्त्री कृष्णकुमार तामाङ यसअघि नै सपथ खाइसकेका छन्।
साउन २० गते मुख्यमन्त्री नियुक्त भएका बानियाँले गत मंगलबार प्रदेशसभामा विश्वासको मत पाएका थिए। ११० सदस्यीय सभामा उनले ६३ मत प्राप्त गरेका थिए।
हामी क्षमा चाहन्छौं यो पोस्ट धेरै पुरानो भएको ले कमेन्ट बक्स बन्द गरेको छौं |