भगवती मानव कल्याण संगठनको कर्म : ८ हजार परिवार नशामुक्त

काठमाडौं :  भगवती मानव कल्याण संगठनले काठमाडौमा मासिक दिव्य महाआरतीक्रम सम्पन्न गरेको छ ।

पशुपती मन्दीर परिसर स्थित सुमार्गी भवनमा प्रत्येक महिनाको पहिलो शनिबार हुँदै आएको महाआरतीक्रम अन्तर्गत २०८२ साल भाद्र महिनाको महाआरती दिव्यताका साथ सम्पन्न भएको हो ।

कार्यक्रमको सञ्चालन गर्दै संगठनका काठमाडौं उपत्यका शाखा अध्यक्ष तुलसीराम भण्डारीले महाआरतीको महत्वको विषयमा प्रकाश पार्नुभयो । उहाँले प्रत्येक महिनाको पहिलो शनिवार पशुपतिनाथ मन्दिर परिसरमा रहेको सुमार्गी भवनमा हुने महाआरतीमा उपस्थित हुन आह्वान गर्नुभयो । महाआरतीमासाधिका कविता केसी र विनिता दाहालले जय–जयकार गरेका थिए भने दिव्य महाआरतीको साधना लिडिङ संगठनका सचिव नारायण सेढाईंले गर्नुभएको थियो ।

यस्तै वाद्यवादनमा स्वेता सिंखडा र कविता केसीको सहभागिता रहेको थियो । कार्यक्रम समापनका क्रममा बोल्दै सचिव सेढाईंले आगामी शारदीय नवरात्रको अष्टमी नवमी र दशमीका दिन भारतको मध्य प्रदेश स्थित सहडोल जिल्लामा रहेको पञ्चज्योति शक्तितिर्थ सिद्धाश्रम धाममामा हुने आत्मोत्थान शिविरमा सहभागि भएर एक पूर्ण कुण्डलिनि जागृत ऋषिको सानिध्यमा हुने दिव्य आरतीको लाभ प्राप्त गर्न आग्रह गर्नुभयो ।

कार्यक्रममा साधक राजु वस्यालले देशको समसामयिक विषयमा वोल्दै अध्यात्मिक चेतनाको अपरिहार्यताको वारेमा प्रकाश पार्नुभयो । भगवती मानव कल्याण संगठन धर्मरक्षा, राष्ट्र रक्षा र मानवताको रक्षा गर्ने उद्देश्य हेतु निरन्तर समाजमा कार्य गर्दै आएको छ ।

संगठनले विगत १६ बर्षदेखि नेपालमा भय, भोक र भष्टाचार मुक्त समाज र नशा–मांशाहारमुक्त चरित्रवान समाज निर्माण गर्ने लक्ष्य लक्ष्य अन्तर्गत विविध कार्यक्रमको आयोजना गर्दै आएको छ । संगठनले चलाएको नशामुक्ति अभियानमा हालसम्म ८ हजार परिवारलाई नशामुक्त गरिसकेको संगठनले दाबी गरेको छ ।

संगठले नशामुक्त नेपाल–समृद्ध नेपालको देशव्यापी अभियान अन्तर्गत अध्यात्मिक अनुष्ठान, पदयात्रा, सचेतना र खबरदारीका विविध कार्यक्रमको आयोजना गर्दै आएको छ ।