‘एकवृक्ष राष्ट्रको नाममा’ अभियान अन्तर्गत भक्तपुरमा वृक्षारोपण

काठमाडौं : भगवती मानव कल्याण संगठनले ‘एकवृक्ष राष्ट्रको नाममा’ अभियान अन्तर्गत भक्तपुरमा वृक्षारोपण गरेको छ ।
भक्तपुरको बालकोट स्थित ब्रम्हानगर टोल सुधार समिति र स्थानीय तहसँग सहकार्य गर्दै संगठनले वृक्षारोपण गरेको हो । बढ्दो प्रदुषण न्यूनिकरण, बाढी पहिरोको बढ्दो जोखिम न्युनिकरण, जलवायु परिवर्तन नियन्त्रण, वातावरण सचेतना लगायतको लक्ष्य राखी वृक्षारोपरण गरिएको संगठनका सचिव नारायण सेढाइको भनाइ छ । वृक्षारोपणमा जनप्रतिनिधिहरुको समेत सहभागिता रहेको थियो ।

भकतपुर वडा नं ३ की वडाध्यक्ष मिना कार्कीले वक्षारोपण गरेका विरुवाहरु संरक्षण गरिने प्रतिवद्धता व्यक्त गर्नुभयो । कार्यक्रममा पूर्व अध्यक्ष शान्तिराम ओलीको सक्रियता एवम् स्थानीय काँशीनाथ लम्साल, शंकर कार्की, गोकर्ण राउत, शरु बानियाँ लगायतले सहजीकरण गरेका थिए । संगठनका पदाधिकारीहरु अस्मिता दाहाल, संयोग ओली, लय ओली लगायतले प्राविधिक सहयोग गरेका थिए ।

वृक्षारोपणका क्रममा लप्सी, बैंस, लाँकुरी, ज्याकाराण्डा, पुँवाले, अम्बा, किम्बु लगायतका विरुवाहरु लगाइएको संगठनकी काठमाडौं उपत्यकाकी संगठन मन्त्री कमला ओलीले बताउनुभयो । यस अघि संगठनले अभियान दोस्रो वर्षमा प्रवेश गरेकै समय पारेर काभेपलाञ्चोकको बनेपा र कञ्चनपुरको महेन्द्रनगरमा वृक्षारोपण गरेको थियो । संगठनले विगत १६ बर्षदेखि नेपालमा भय, भोक र भष्टाचार मुक्त समाज र नशा–मांशाहारमुक्त चरित्रवान समाज निर्माण गर्ने लक्ष्य लक्ष्य अन्तर्गत विविध कार्यक्रमको आयोजना गर्दै आएको छ ।

संगठनले चलाएको नशामुक्ति अभियानमा हालसम्म ८ हजार परिवारलाई नशामुक्त गरिसकेको संगठनले दाबी गरेको छ । संगठले नशामुक्त नेपाल–समृद्ध नेपालको देशव्यापी अभियान अन्तर्गत अध्यात्मिक अनुष्ठान, पदयात्रा, सचेतना र खबरदारीका विविध कार्यक्रमको आयोजना गर्दै आएको छ ।