एमाले अध्यक्ष ओलीसँग झलनाथ खनालको भेट

काठमाडौं ः नेकपा (एकीकृत समाजवादी)का सम्मानित नेता झलनाथ खनाल एमाले अध्यक्ष केपी शर्मा ओलीसँग भेट गरेका छन् । अध्यक्ष माधवकुमार नेपालले नेकपा (माओवादी केन्द्र)सँग पार्टी एकता गरेपछि खनालले पहिलोपटक खनालले गुन्डु पुगेर एमाले अध्यक्ष ओलीसँग भेटवार्ता गरेका हुन्।

खनाल आफ्नी जीवनसंगिनी रवि लक्ष्मी चित्रकारको उपचारका क्रममा ओलीले देखाएको सद्भावका लागि धन्यवाद दिन गुण्डु पुगेका हुन्। भेटका क्रममा वर्तमान राजनीतिक अवस्थाबारे सामान्य छलफल भएको बताइएको छ ।

भेटपछि जारी गरिएको प्रेस विज्ञप्तिमा खनालको सचिवालयले सञ्चारमाध्यममा आएका ‘भ्रमपूर्ण समाचारहरूमा नलाग्न’ आग्रह गरेको छ।

खनालका प्रेस सहयोगी मिलन उपाध्यायका अनुसार उनी आज नेकपा (माओवादी केन्द्र)का संयोजक पुष्पकमल दाहाल ‘प्रचण्ड’सँग पनि भेट गर्ने तयारीमा छन्।

माओवादी केन्द्र र एकीकृत समाजवादीबीच भएको एकता प्रक्रियामा खनाललगायत केही नेताहरूले भने असहमति जनाउँदै बहिस्कार गरेका छन्।